Ish-kryeministri Sali Berisha ngre dyshime se kreu i qeverisë Edi Rama është aksioner në kompanitë e naftës.
“Nafta në Shqipëri arrin çmimin më të lartë në botë. Kjo ndodh kur kreu i meduzës bëhet zëdhënës i rritjes së çmimit të kompanive të naftës, ose aksioner i tyre”, shkruan Berisha në një postim në FB.
Këtë të Mërkurë, çmimi i naftës në vend arriti një tjetër rekord historik, duke u tregtuar me mbi 250 Lekë për Litër në pikat e furnizimit të automjeteve.
Një protestë është lajmëruar në 5 pasdite para kryeministrisë kundër rritjes së çmimeve.
Ndërkohë, kryeministri Edi Rama ka paralajmëruar dhe rritje të çmimit të energjisë elektrike, duke u shprehur se rritjet e çmimeve janë efekteve të luftës në Ukrainë.
“Këtë luftë nuk e ka zgjedhur Shqipëria dhe ne shqiptarët as nuk e ndalim dot, as nuk shmangim dot. Duhet vetëm ta përballojmë me kurajo, besim dhe durim. Të bashkuar, jo të ndarë”, u shpreh Rama.
