Real Madrid ka marrë një fitore bindëse 4-1 me përmbysje kundër Real Sciedad në javën e 27-të të La Liga-s dhe ka përforcuar vendin e parë në renditjen e kampionatit.
Ka nisur keq ndeshja në Bernabeu për skuadrën e Carlo Ancelotti-t, me miqtë që kanë kaluar në avantazh pas vetëm 10 minutash me një penallti të Oyarzabal.
Përmbysja e Los Blancos ka ardhur në harkun e tri minutave në fundin e pjesës së parë. Camavinga ka barazuar me një goditje të frikshme nga distanca në minutën e 40-të dhe është bërë lojtari i dytë më i ri i madrilenëve që shënon një gol nga jashtë zonë në La Liga që nga sezoni 2003/04, pas Vinicius Junior.
Në të 43-ën ka ardhur një tjetër perlë e vendasve, me Luka Modric që ka përmbysur gjithçka me një gjuajtje të mrekullueshme gjithashtu nga jashtë zone. Asisti është dhënë nga Benzema, i cili është bërë lojtari i tretë që arrin 100 asiste në La Liga në shekullin e 21-të, pas Lionel Messi-t(192) dhe Daniel Alves-it (103).
Karim ka qenë protagonist edhe në pjesën e dytë, duke shënuar golin e tretë me penallti. Pokeri është kompletuar nga Marco Asensio në minutën e 79-të.
