Një aksident ka ndodhur në hyrje të fshatit Drobonik në Berat.
Një automjet, tip ‘Citroen’, ka humbur kontrollin dhe ka dalë nga rruga, duke rënë në kanal.
Mësohet se mjeti ka dalë nga rruga për shkak të shpejtësisë së madhe dhe kthesës së vështirë të rrugës.
Burimet zyrtare të policisë konfirmojnë se automjeti rezulton të jetë në pronësi të një gruaje nga fshati Bardhaj, ndërkohë që në automjet udhëtonte një djalë, identiteti i të cilit nuk dihet ende, pasi drejtuesi i mjetit ka dalë nga makina dhe është larguar nga vendngjarja.
Në vendngjarje kanë shkuar forca të shumta policie që po kryejnë edhe këqyrjen e vendit të aksidentit, për të zbardhur shkaqet dhe dinamikën e tij.
Dyshimet e para të policisë janë se drejtuesi i mjetit mund të ketë qenë pa patentë.
Të gjitha këto dyshime lidhen me faktin se drejtuesi i mjetit është larguar menjëherë pas aksidentit, ndërkohë që policia është duke u përpjekur të gjejë pronaren e mjetit, për të dëshmuar se kujt ia kishte lënë makinën.
