Pushteti në Rusi është në një situatë aspak normale, në kohën që Moska është duke treguar një agresivitet në rritje në Ukrainë.
Edhe pse mediat ndërkombëtare e kanë parë si rrezik kryesor për Ukrainën Vladimir Putinin, duke dyshuar se mund të ketë probleme serioze mendore, ai nuk është i vetmi me pozicione ekstreme sa i përket situatës.
Ministri i Mbrojtjes Sergei Shoigu është po ashtu një figurë kyçe e pushtetit në Kremlin. Ai foli kur u miratua pavarësia e Luahsnkut dhe Donjetskut. Shiugu foli edhe për rrezikun që Ukraina të merrte armë bërthamore, që sipas tij, ishte opsion në tavolinë.
Fjala e tij kishte peshë. Jo vetëm se ai është ministër i mbrojtjes si dhe gjeneral i dekoruar me titullin më të lartë, atë të Heroit të Rusisë, por sepse ai është praktikisht personi më i besuar i presidentit Putin.
Ai është diplomuar në arkitekturë, djali i një prej familjeve elitare të një republike pothuajse të humbur të Bashkimit Sovjetik, atë të Tuvës, në kufi me Mongolinë. I ati vjen pikërisht nga një nga fiset autoktone me origjinë turkofone, ndërkohë që paradoksalisht e ëma ka origjinë ukrainase, nga Luhansku.
I dalluar si shef i Emergjencave gjatë viteve ‘90, iu bashkua më vonë Putin ku ishte edhe lider i një partie si Rusia e Bashkuar, që mbështeste pikërisht “carin” e ri të Shën Petersburgut. Nga viti 2012 mban vendin e ministrit të Mbrojtjes, pozicion i konsoliduar me fushatën e suksesshme të aneksimit të Krimesë.
Marrëdhëniet me liderin e Kremlinit janë të shkëlqyera, dhe përtej pushtetit i bashkon edhe dashuria për natyrën e egër të Siberisë, ku të dy kanë kaluar periudha të gjata në vetmi. Politikisht dhe ideologjikisht rus, ai duket gjithsesi më i lidhur me pjesën aziatike sesa atë europiane. Flet gjuhën kineze, japoneze dhe turke, koleksionon shpata të vendeve aziatike dhe thuhet se praktikon budizmin dhe ritet e shamanëve të fisit të tij.
Është pikërisht ai që po koordinon fushatën në Ukrainë, dhe në rast përkeqësimi të konfliktit mund të ketë një rol vendimtar. Bashkë me Putin dhe kreut të Ushtrisë ai është një nga tre personat që mban kodet që urdhërojnë sulmin bërthamor. Nisur nga këto të dhëna, Shoigu duhet parë si person jo dhe aq pa rrezik.