Ministria për Evropën dhe Punët e Jashtme, Olta Xhaçka këtë të Enjte ka deklaruar se Shqipëria po vazhdon të koordinohet me vendet aleate në kuadër të NATO-s dhe OSBE-së, në takimet e nivelit të lartë që po përgatiten në këto organizata dhe në dialog me Bashkimin Evropian për një reagim të bashkërenduar që do të përfshijë sanksione të rënda kundër Rusisë.
Ajo tha nga foltorja e Kuvendit se pesë shqiptarë janë me mision në Ukrainë. Ministrja bëri me dije se prej 11 të punësuarve në këtë mision, 6 janë larguar dhe 5 të tjerë janë në Ukrainë. “Jemi në kontakt me OSBE për zbatimin e Planit te evakuimit dhe kemi kontakt të vazhdueshëm për secilin prej të sekonduarve”, tha ministrja Xhaçka.
Xhaçka tha po ashtu se 3 qytetarë shqiptarë kanë kërkuar ndihmë sepse fluturimet e tyre të avionit ishin anuluar. Ministrja bëri me dije se këtyre personave u është sugjeruar që të kalojnë në rrugë tokësore në kufirin me Poloninë ose Rumaninë ku ambasadat e Shqipërisë janë të gatshme t’i presin.
Në fjalën e saj në Kuvend, Xhaçka e konsideroi pushtimin rus të Ukrainës si një sulm ndaj sigurisë evropiane që u bë flagrant sot, ku sipas saj e bën edhe më të domosdoshëm një front të bashkuar në mbrojtje të parimeve themelore që përfshijnë edhe rajonin tonë.
