Janë mbyllur dy sfidat e prapambetura të Kategorisë së Parë, të cilat u shtynë për shkak të reshjeve të dendura të dëborës. U luajtën Pogradeci-Butrinti dhe Maliqi-Vora.
Në sfidën e parë Pogradeci fitoi me rezultatin minimal 1-0 përballë Butrintit. Një ndeshje e luftuar me skuadrat që gjenden në pjesën e poshtme të tabelës. Golin e vetëm për vendasit e realizoi Topllari në minutën e 29. Me këtë fitore Pogradeci shkon në kuotën e 20 pikëve, në vendin e 13, ndërsa Butrinti mbetet në vendin e 11 me 1 pikë më shumë.
Shumë me emocione ishte sfida mes Maliqit dhe Vorës, e cila u luajt përtej minutës së 100. Kjo sfidë përfundoi me fitoren 2-1 të vendasve, por nuk munguan dhe kartonat e kuq.
Golat u shënuan në pjesën e dytë me Maliqin që kaloi në avantazh me Kapllanin. Festa zgjati shumë pak pasi Vora barazoi me Kozin në minutën e 59. Loja u shty përtej normales, aq sa u akorduan mbi 10 minuta shtesë. Kur dukej si gjithçka do përfundonte, Maliqi shënoi në fund me Isufin golin e fitores.
