Sot ka nisur zyrtarisht fushata për zgjedhjet e pjesshme vendore të 6 marsit, ku në Bashkitë Shkodër, Durrës, Dibër, Lushnje, Vorë e Rrogozhinë do të zgjidhen kryebashkiakët e rinj. Megjithëse prej ditësh po zhvillohen takime dhe prezantime kandidatësh, sot ka startuar fushata zyrtare, bazuar në vendimin e marrë nga Komisioni Rregullator i KQZ.
Ish-Kryeministri Sali Berisha, i cili mbështet kandidatët e koalicionit “Shtëpia e Lirisë” ka preferuar që hapjen zyrtare të fushatës ta bëjë në Durrës, ku ka zhvilluar dy takime me banorë të Manzës dhe Hamallajt. Berisha ka kërkuar mbështetjen për kandidatin Ardian Muka, por nuk ka lënë mënjanë akuzat në drejtim të kryeministrit Edi Rama dhe Lulzim Bashës, si dhe kandidatëve të tyre respektivë Emiriana Sako (PS) dhe Luan Hoti (PD).
Në anën tjetër Lulzim Basha ishte në Shkodër ku ka prezantuar kandidatit Xhemal Bushati, fillimisht me një takim të zgjeruar te pedonalja e qytetit dhe më pas ka ecur në këmbë duke takuar qytetarë të ndryshëm. Basha ka kërkuar votat për Bushatin, ndërsa e konsideroi Shkodrën si bastionin e demokratëve.
Në anën tjetër, Kryeministri Edi Rama i është përmbajtur zotimit se nuk do të jetë pjesë e fushatës, por ka deleguar në terren ministra e deputetë, si dhe zyrtarë të administratës, në mbështetje të kandidatëve socialistë.
Taulant Balla në Lushnje dhe Damian Gjiknuri në Durrës kanë prezantuar kandidatet socialiste, Eriselda Sefa dhe Emirjana Sako, duke kërkuar vazhdimin e bashkive nga të njëjtët emra që ndodhen në detyrat e kryebashkiakeve si të komanduara ose emëruara.
Zgjedhjet do të zhvillohen në Shkodër, Dibër, Durrës, Vorë, Rrogozhinë dhe Lushnjë. Ndonëse në shumicën e tyre, këto bashki ishin prej shumë kohësh, pa një kryetar të zgjedhur, Presidenti Meta priti vendimin e Gjykatës Kushtetuese për zgjedhjet e 30 qershorit 2019, për të dekretuar votimet e reja. Në zgjedhjet e 30 qershorit, opozita nuk mori pjesë, duke i bojkotuar ato.
Në këto zgjedhje garojnë Partia Socialiste, PD e Bashës si dhe koalicioni “Shtëpia e Lirisë”. Kandidatët e këtij koalicioni janë zgjedhur përmes primareve të mbajtura në 6 bashki,të udhëhequr nga Grupi i Rithemelimit, dhe ish kryeministri Sali Berisha.
