Ish-kryeministri Sali Berisha pohoi ekzistencën e përgjimeve mes anëtarëve të një grupi ndërkombëtar krimnal droge goditur së fundmi, në të cilat përmenden emra të prokurorëve dhe ministrave shqiptarë.
Deklaratën, ish-kryeministri e bëri nga salla e Kuvendit, e më tej foli dhe për gazetarët jashtë ambienteve të parlamentit.
“Hetimi i fundit i kryer nga disa shtete, Itali Beligjikë, Francë, Spanjë, pas zbulimit të një aplikacioni që përdornin bandat shqiptare dhe qeveritarët shqiptarë për komuniikime të fshehta, themelet e narkoshtetit po dridhen si një tërmet. Ju garantoj se në ato përgjime ka emra ministrash, drejtorësh, prokurorësh ,gjykatësisht e shumë të tjerë. E mirëpres si një zhvillim mjaft pozitiv në tronditjen e themelit të narkoshtetit. U bëj thirrje këtyre agjencive për hetime të thella e të pavaruara”, tha Berisha.
“Një ndihmë të veçantë ka dhënë këtu përdorimi i aplikacionit SKY ECC që përdoret nga narkoqeveritarët dhe bandat shqiptare,” saktësoi ish-kryeministri.
Berisha tha se në përgjime “janë emra ministrash të të gjitha niveleve”. I pyetur nga gazetarët, ai sqaroi se emrat konretë nuk i di.
I ka SPAK-u këto të dhëna? Pyetjes iu përjgjigj me ironi: Kush SKAP-i?!
Mega-aksioni
Mega-aksioni në fjalë u zhvillua më herët gjatë javës.
Agjencia evropiane për bashkëpunim të zbatimit të ligjit (Europol) njoftoi më 15 Shkurt se në një operacion të përbashkët kundër trafikantëve të drogës, janë arrestuar 45 persona. Europol bëri me dije se ky operacion ishte “goditje nga kriminelëve shqipfolës që kanë vërshuar Evropën me kokainë”.
Ky operacion i madh, që është zhvilluar kryesisht në Spanjë dhe Belgjikë, vlerësohet të jetë në kuadër të operacioneve të gjera kundër importit në sasi të mëdha të drogës nga Amerika Latine.
“Një operacion ndërkombëtar, me përfshirjen e autoriteteve të sundimit të rendit dhe ligjit në shtatë shtete, ka rezultuar me shpartallimin e njërit prej rrjeteve të trafikimit shqipfolës, më aktiv në Evropë. Sot, Eurojust dhe Europol mbështetën aksionet në Belgjikë dhe Spanjë, gjatë të cilave u bastisën mbi 80 lokacione dhe 45 të dyshuar u arrestuan”, thuhet në njoftimin e kësaj agjencie të Bashkimit Evropian që e ka selinë në Hagë të Holandës.
Dyshohet se të arrestuarit kishin importuar kokainë nga Amerika Latine në disa vende në Evropë, duke organizuar transportin e drogës përmes avionëve, anijeve, makinave e kamionëve, dhe kanë udhëhequr tregun e shitjes.
Spanja dhe shtetet e tjera të BE-së, sipas Europol-it, janë përdorur si vende për të fshehur aktivitetin e tyre.
Europol tha se “ky rrjet kriminal i nivelit të lartë ka themeluar një sërë ndërmarrjes në shtete të ndryshme për të pastruar paratë, përfshirë edhe në Kroaci dhe Spanjë. Pjesëtarët e këtij grupi shpesh kanë udhëtuar në Dubai, Meksikë dhe Kolumbi për të aranzhuar bizneset e tyre ilegale, duke përdorur komunikim të koduar për të koordinuar aktivitetet e tyre”.
Në këtë aksion kanë marrë pjesë 600 oficerë nga Belgjika, Spanja, Kroacia, Gjermania, Italia, Holanda dhe Shtetet e Bashkuara të Amerikës, që ka angazhuar zyrtarë të Byrosë Federale të Hetimeve (FBI).
Operacioni ka nisur më 2018 dhe është një prej më të mëdhenjve që e kanë mbështetur Europol dhe Eurojust.
