Valbona Pasho (Beqiri), motra e Gentian Beqirit dhe vajza e Nezir Beqirit që u vranë mëngjesin e 15 gushtit 2012 në Elbasan ka dëshmuar para Prokurorisë së Posaçme Kundër Korrupsionit dhe Krimit të Organizuar (SPAK).
Valbona Pasho (Beqiri), u është përgjigjur pyetjeve të prokurorëve Behar Dibra dhe Sotir Kllapi, rreth ngjarjes së vrasjes të babë e bir, hasmërive dhe konflikteve që kishte familja e saj me njerës të tjerë në Elbasan.
Dëshmitarja ka treguar në gjykatë se familja e saj, ka pasur probleme me një fis në Elbasan, që nga fundi i vitit 2015, kur në qytet është vrarë Sokol Çapja. Valbona, ka treguar në gjykatë se pas vrasjes së Sokol Çapjes, ajo dhe vetë familja e saj, qëndronin të frikësuar dhe nuk dilnin lirshëm në qytet. Kjo pasi, i ndruheshin një hakmarje të mundshme. Dëshmitarja shton se veç babait dhe Gentianit, asaj i është vrarë dhe një vëlla tjetër, Saimir Beqiri. Valbona ka treguar se një nga të pandehurit, Etjen Cani shkonte pothuajse çdo ditë tek shtëpia e tyre dhe vizitonte Gentianin, pasi konsiderohej si njeri i besuar.
“Këtij personi dera i hapej sa herë që ai trokiste, pasi ai ishte bërë si të shtëpisë. Por në ditën e varrimit, Etjen Cani, nuk ka shkuar në ceremoni dhe as në drekën tradicionale të familjes dhe shoqërisë, lëvizje kjo që i ka bërë shumë përshtypje dhe që në atë periudhë ka ngjallur dyshime mbi besnikërinë dhe rolin e Canit dhe personat e tjerë, që vinin dhe vizitonin Gentjanin brenda në shtëpi,”– shton Pasho.
Pas përfundimit të dëshmisë, Valbona Pasho, është lënë e lirë të kthehet në Itali, ndërsa gjykata ka urdhëruar prokurorinë dhe Policinë e Shtetit, që të gjejë dëshmitaren Joniana Hasani, për të dëshmuar në seancën e 2 Marsit që do zhvillohet në orën 10:00. Hasani është motra e të dënuarit me 25 vite burgim, Armando alias Butrint Hasani, i cili vuan dënimin në burgun e Burrelit për vrasjen e Sokol Çapjes në vitin 2015.
Burimi: OraNews
