Eshtë mbajtur dje, 15 shkurt 2022, në Bruksel takimi i 12-të i Komitetit të Stabilizimit dhe Asociimit (SA) ndërmjet Shqipërisë dhe Bashkimit Evropian.
Komiteti kërkon sqarim lidhur me ngritjen e agjencisë së re për koordinimin e donatorëve (SASPAC) në krye të të cilit Rama ka vendosur ish deputetin socialist, Ilir Beqja i cili është nën hetim nga SPAK për abuzim me tenderat në kohën kur drejtonte Ministrinë e Shëndetësisë,
Agjencia Shtetërore e Programit Strategjik dhe Koordinimit të Ndihmës, e njohur edhe si State Agency for Strategic Programming and Aid Coordination, (SASPAC), në varësi të Kryeministrit u ngrit në nëntor të 2021.
“Komiteti vuri në dukje ngritjen së fundmi të një agjencie të re për koordinimin e donatorëve (SASPAC) dhe nevojën për sqarim të mëtejshëm të roleve dhe përgjegjësive përkatëse, si dhe ndërveprimet me aktorë të tjerë” thuhet në njoftimin për shtyp.
Në nëntor 2021 kur Ramën e pyetën pse zgjodhi Beqajn në krye të kësaj agjencie kur ai ishte në hetim nga SPAK për abuzim me tenderat në kohën kur drejtonte Ministrinë e Shëndetësisë, u shpreh se vlerësonte aftësitë e tij.
Historik për dënimet për korrupsion
Komiteti e nxiti Shqipërinë që të ruajë vrullin e reformave, si dhe nënvizoi se për gatishmërinë për negociatat e pranimit vendi duhet të përmirësojë koordinimin, të rrisë burimet dhe komunikimin kushtuar integrimit në BE.
Vlerësoi miratimin e zgjatjes së mandatit të organeve të vetingut dhe vuni në dukje nevojën për vazhdimin e reformës në drejtësi.
“Komiteti theksoi rëndësinë e intensifikimit të mëtejshëm të luftës kundër pastrimit të parave dhe të gjitha masave kundër produkteve të krimit, si dhe kujtoi angazhimin e nivelit të lartë politik për zbatimin e planit të veprimit të Task Forcës së Veprimit Financiar (FATF). Shqipëria duhet të vazhdojë ndërtimin e historikut të dënimeve të formës së prerë në rastet e krimit të organizuar, korrupsionit, trafikimit dhe pastrimit të parave” thuhet në deklaratë.
Gjithashtu Komiteti theksoi nevojën për përpjekje të mëtejshme, veçanërisht për të reduktuar kërkesat e pabazuara për azil nga shtetasit shqiptarë në shtetet anëtare të BE-së. Politika e vizave e Shqipërisë mbetet ende për t’u përafruar plotësisht me acquis e BE-së.
Sa i takon zgjedhjeve parlamentare të prillit 2021 Komiteti vlerëson se ishin përgjithësisht të organizuara mirë dhe kërkoi informacion mbi procedurat në vazhdim për trajtimin e çështjeve të pazgjidhura, duke përfshirë planet për reformën e ardhshme zgjedhore.
Takimi
Takimi u kryesua nga znj. Michela Matuella, Drejtore e deleguar për Ballkanin Perëndimor në Drejtorinë e Përgjithshme për Politikat Evropiane të Fqinjësisë dhe Negociatat e Zgjerimit të Komisionit Evropian, së bashku me Shkëlqesinë e Tij z. Zef Mazi, Kryenegociator për integrimin e Shqipërisë në BE dhe znj. Adea Pirdeni, Zëvendësministre e Drejtësisë në Shqipëri. Në takim foli edhe Shkëlqesia e Tij, z. Luigi Soreca, Ambasador, Shef i Delegacionit të Bashkimit Evropian në Shqipëri.
/Ora News/
