Sali Berisha prezantoi sot në Rrogozhinë kandidatin e “Shtëpisë së Lirisë”, Hekuran Xhani, i cili do të garojë në zgjedhjet e pjesshme vendore të 6 marsit.
Ai i bëri thirrje qytetarëve të bashkohen në këtë fushatë për t’i dhënë Shqipërisë shpresën e një fitoreje të thellë të ardhshme, e triumfit të opozitës së vërtetë shqiptare dhe triumfit të votës së lirë.
“Këto zgjedhje në 6 bashki zhvillohen vetëm në një pjesë të bashkive të vendit, por rëndësia e tyre është kombëtare dhe e jashtëzakonshme. Qytetarët e Rrogozhinës dhe 5 bashkive të tjera firmosin kthesën e madhe, shpresën e madhe, firmosin ndryshimin jetik për të ardhmen tonë. Rrogozhina vazhdon të braktiset njëlloj si e gjithë Shqipëria. Kjo nuk vjen se shqiptarët nuk kanë dashuri për trojet e tyre, por nuk përballen dot m,e jetën e përditshme, në varfërinë që i zhyt çdo muaj e më shumë një regjim plaçkitës, arrogant që nuk do t’ia dijë për hallet dhe dertet e qytetarëve, i vjedh ata ditën dhe natën e si rezultat i detyron të largohen”, tha Berisha.
Ish-kryeministri shtoi se Shqipëria nga vendi me rrogat më të larta në rajon që ishte 8 vite më parë, sot është vendi me rrogat më të ulëta në rajon.
“Vetëm këtë vit rritja e çmimeve është e pandalshme. Rrogat n raport me çmimet zvogëlohen çdo muaj e më shumë”.
Berisha tha se qytetarët e Shqipërisë vetëm vidhen nga kjo qeveri arrogante e cila nuk njeh kufij një shpenzimet e luksit, vilat, udhëtimet dhe orgjitë.
“Ministra që ulen dhe porosisin 1000 dollarë biftekun me paratë tuaja, kreu i Meduzës shpenzon 15 mijë euro në orë fluturim me avion në dispozicion, ministre që udhëton 15 herë Tiranë-Dibër për takime partiake me helikopter”.
Berisha tha se qeveria nuk do t’ia dijë për të ardhmen e shqiptarëve. Përveç kësaj, shtoi ai, Edi Rama firmos Ballkanin e Hapur. Sipas Berishës, kjo nisëm është falimentim për fermerët e Rrogozhinës dhe të Shqipërisë.
Berisha bëri thirrje që demokratët mos votojnë kandidatin e Lulzim Bashës, Ferdinand Saraçin pasi sipas tij ai përfaqëson vulën e PD të marrë me dhunë nga policët e Edi Ramës.
Berisha ftoi të gjithë qytetarët e Rrogozhinës të bashkohen me votën e lirë. Sipas tij Basha mashtroi për 8 vite se do bënte primaret dhe nuk i bëri kurrë.
“Mos humbisni votën tuaj për përfaqësuesit e Lulzim Bravës. Ai që do vijë të prezantojë Saraçin pyeteni për aferat e mëdha korruptive të Lulzim Bravës. Kur je peng t’i japin recetat që në mëngjes se si do të sillesh dhe çfarë poshtërsie do të bësh. Se sa të flasë për të ardhmen ai që vetëm humbet, flet dhe deklaron se Berisha po ndihmon Ramën, paçka se me bisht ndër shalë ulet dhe voton Ramën, voton vetingun të cilin e kishte quajtur aktin më mafioz kombëtar dhe ndërkombëtar”.
