U zhvilluan ditën e sotme punimet e Asamblesë së Përgjithshme të Shoqatës Rajonale të Futbollit Lezhë, ku janë zgjedhur delegatët që do të përfaqësojnë SHRF Lezhë në Asamblenë e Përgjithshme të FSHF-së më 2 mars si dhe propozuan trajnerin e mirënjohur Sulejman Starova si kandidat për President të FSHF.
Në këto punime morën pjesë 12 shoqatat anëtare të përfaqësuar me 18 delegatë. Dy anëtarët e Komitetit Ekzekutiv të FSHF-së, Fatbardh Jera dhe Vasil Bici përshëndetën punimet e Asamblesë si dhe përgëzuan anëtarët e SHRF Lezhë për punën e bërë gjatë kësaj kohe në këtë zonë. Kryetari i kësaj shoqate, Ridvan Kulli, falenderoi anëtarësinë për punën e kryer deri më tani dhe garantoi mbështetje maksimale tashmë që SHRF Lezhë ka buxhetin e saj dhe autonomi menaxheriale. Anëtarësia vendosi të propozojë emrin e Sulejman Starovës si kandidat për President të Federatës Shqiptare të Futbollit dhe emrin e Vasil Bicit si kandidat për anëtar të Komitetit Ekzekutiv të FSHF-së.
Në përfundim të votimit delegatët e SHRF Lezhë zgjodhën gjithashtu me unanimitet të plotë Kristjan Xhidodajn, Dario Palin dhe Leonard Preloshin për t’i përfaqësuar në Asamblenë e Përgjithshme Zgjedhore të FSHF-së.
Pas Asamblesë, për mediat foli një prej delegatëve të zgjedhur nga SHRF Lezhë, Kristjan Xhidodaj, që vlerësoi punimet dhe e vendimet e marra në mbledhjen e sotme. “Sot ishte një ditë e veçantë përsa i përket Shoqatës Rajonale të Futbollit Lezhë. Miratuam tre delegatët për në Asamblenë e Përgjithshme të Federatës Shqiptare të Futbollit. Miratuam buxhetin e vitit 2022. Gjithashtu, propozuam dhe miratuam kandidat për President të Federatës Shqiptare të Futbollit z.Sulejman Starova. Unë shpresoj shumë që në vijim zona e Lezhës, duke parë dhe pjesën gjeografike, pasi është zona më e madhe në gjithë Shqipërinë nga pikëpamja territoriale, shpresojmë që autonomia nga nga financiare ne do na ndihmojë shumë. Shpresojmë që do të masivizojmë në maksimum fëmijët në futboll.”
