Prej ditës së djeshme, disa nga ambasadorët e vendeve kryesore të akredituara në Tiranë, kanë shtuar presionet mbi politikën shqiptare lidhur me miratimin e ndryshimit Kushtetues, që zgjat me dy vite, afatin e organeve të Vetting.
Fillimisht ishte një deklaratë e përbashkët e ambasadorëve të BE-SHBA që i bënte thirrje politikës për të miratua zgjatjen e afateve të organeve të Vetting, madje theksohej se vota pro është e lidhur direkt me procesin e anëtarësimit në BE.
Pas deklaratës së BE-SHBA, erdhi reagimi i ambasadorit gjerman dhe atij britanik, që mbështesnin të njëjtën gjë, ndërsa apelonin për bashkimin e votave përtej interesave partiake.
Sot ka ardhur një tjetër reagim nga Prezenca e OSBE-së në Shqipëri, e cila ka vijuar të njëjtën linjë dhe ka bërë thirrje për zgjatjen e mandatit institucioneve të vetingut.
“Prezenca e OSBE-së në Shqipëri i bashkohet deklaratës së Delegacionit të Bashkimit Evropian dhe të ambasadës së Shteteve të Bashkuara në mbështetje të zgjatjes të mandatit të institucioneve të vetingut. Duke folur në një takim vjetor strategjik mes Prezencës dhe Zyrës së Këshillit të Evropës në Tiranë, Kryetari i Prezencës, ambasadori Vincenzo Del Monaco, theksoi progresin e jashtëzakonshëm të arritur deri më tani në reformën në drejtësi dhe shprehu besimin e plotë për rezultate të mëtejshme në luftën kundër krimit dhe korrupsionit. Lidhur me zgjatjen e mandatit të institucioneve të vetingut, Ambasadori Del Monaco më tej përsëriti se ai nuk shikon ndonjë plan B apo kthim mbrapa në reformën në drejtësi”, thuhet në deklaratë.
Pak a shumë po përsëritet e njëjta situatë si ajo e 5 viteve më parë, kur presioni i ambasadorëve çoi në miratimin e reformës në drejtësi me 140 vota.
