Ambasadori i Shqipërisë në OKB, Ferit Hoxha ka shprehur shqetësimin e tij në lidhje me situatën e krijuar në Ukrainë nga prania e forcavce ushtarake të Rusisë.
“Situata e krijuar ka krijuar ankth dhe frikë tek njerëzit në Ukrainë dhe me të drejtë, shqetësime serioze ndërkombëtare, veçanërisht për ne, në Europë.
Dhjetëra batalione janë zhvendosur tashmë në kufirin ukrainas, trupat ushtarake po dërgohen nga pjesa lindore në pjesën perëndimore të Rusisë. Këtu përfshihen forcat e rënda luftarake, tanket, sistemi i mbrojtjes ajrore të artilerisë dhe raketat balistike. Disa mijëra trupa ruse janë dërguar gjithashtu në Bjellorusi”, tha ambasadori në fjalën e tij.
Po ashtu, ambasadori ka theksuar se “Shqipëria beson se kjo krizë mund dhe duhet të zgjidhet me bisedime dhe diskutime. Gjetja e zgjidhjes përmes negociatave ishte fokusi ynë parësor gjatë Kryesimit të OSBE-së, në vitin 2020. E njëjta gjë mbetet edhe tani në Këshill”.
Ambasadori rikonfirmoi mbështetjen e palëkundur të Shqipërisë për sovranitetin dhe integritetin territorial të Ukrainës brenda kufijve të saj të njohur ndërkombëtarisht.
