Për juristin Ledio Braho, zgjatja e mandatit të anëtarëve të KPK-së dhe Komisionit Publik – nismë e mazhorancës – “nuk është çështje imediate”.
Në një intervistë për “A2 News”, Braho solli në vëmendje se më herët, Komisioni i Venecias është shprehur kundër propozimit të një mandati më shumë se pesë vjet për anëtarët e KPK-së.
Ai parashikon se nisma do të sjellë kaos në sistem.
Braho thotë se çështje e ngutshme është boshatisja e gjyqësorit.
“Mandati i mbaron në qershor ose në korrik anëtarëve të KPK-së kam përshtypjen, sepse KPA ka një mandat më të gjatë, 9-vjeçar. Unë nuk e shoh si të domosdoshëm, nuk e shoh se mund të sillte ndonjë krizë kushtetuese, apo ndonjë ngërç në procesin e Vetingut, sepse ligjvënësi e ka parashikuar që me marrëveshjen e famshme kushtetuese, që me ndryshimet kushtetuese që u miratuan me 140 vota të të gjithë deputetëve, që në përfundim të mandatit nëse nuk do mund të mbarohej procesi, të përfundojë procesi i vetingut nga KPK, do të ishin KLGJ dhe KLP që do të kryenin respektivisht për gjyqtarët dhe prokurorët vetingun. Dhe KLGJ dhe KLP janë organe të reja të drejtësisë, nuk janë ato organet e famshme të vjetra të anatemuara, por janë organe të reja drejtësisë dhe unë nuk shoh sepse ne nuk duhet të kemi besim te KLGJ apo KLP në lidhje me vijimin e procesit të vetingut prej tyre, aq më tepër kur është parashikuar në Kushtetutë”, tha Braho.
“Po ashtu në kohë dhe komisioni i Venecias kur është propozuar drafti fillestar që mandati i KPK të ishte shtatë vjet dhe jo pesë vjet, Komisioni i Venecias ka qenë kundër, sepse e ka konsideruar një afat të gjatë dhe që mund të sillte një krizë në sistem. Ndërkohë tani ne po tentojmë sërish ta zgjasim afatin, afat që bie ndesh me opinionin e Komisionit të Venecias në atë kohë dhe patjetër që kjo do të sjellë kaos në sistem”, u shpreh.
“Ajo që unë e shoh si të ngutshme dhe gjithë klasa politike duhet të marrë masa për të ndërhyrë është boshatisja e gjyqësorit. Ne sot nuk vuajmë për afatin e mandatit të anëtarëve të KPK, por vuajmë sepse kemi gjykata dhe prokurori bosh. Nëse do zgjasim mandatin e KPK dhe nuk do marrim masa për gjykata, ne mund të kemi një KPK dhe KPA, por pas dy vjetësh mund të mos kemi gjykata dhe prokurori”, shtoi juristi.
