Banorët e lagjes “5 Maji” do të ngrihen nesër në protestë.
Përmes një njoftimi për mediat, banorët bëjnë me dije se në orën 09:30, të gjithë do të jenë para Kuvendit të Shqipërisë, për të ngritur zërin në lidhje me projektin që po aplikohet në fund të rrugës “5 Maji”.
NJOFTIMI: Ne mungese te vemendjes se duhur nga Bashkia per problematikat qe kemi ngritur keto kohe ne lidhje me projektin qe po aplikohet ne fund te rruges “5-Maj”, neser, date 27.01.2022, ne oren 09:30 do ngreme zerin te Kuvendi. Ju ftojme te na bashkoheni!
Banorët e shtëpive që janë prishur ose pritet që të prishen në zonën e 5 Majit kanë kaluar ditët më të ftohta në rrugë. Ata u nxorrën me forcë nga Policia e Shtetit nga banesat e tyre. Banorët kanë paditur drejtorin e IMT-të Tiranë dhe kanë premtuar se do t’i mbrojnë shtëpitë e tyre. Qytetarët kanë kërkuar bisedime me qeverinë dhe bashkinë e të kompensohen sipas çmimit të tregut për prishjen e banesave të tyre, kërkesë që nuk u është realizuar.
