Drejtori i ARRSH, Evis Berberi ka qenë i ftuar këtë të mërkurë në studion e Fax News, për të folur në lidhje me sezonin dimëror dhe masat që duhet të marrin qytetarët që të mos bllokohen në rrugë.
Berberi listoi si më problematike zonat veriore të Shkodrës, Pukës apo Dibrës, si dhe zonat verilindore të Librazhdit, të cilat kanë pasur problematika që sipas tij nuk kanë zgjatur në kohë.
Berberi u ndal dhe te rruga e Rinasit, e cila është e bllokuar pjesërisht për ata që lëvizinin nga Tirana, por sipas tij për 3 ditë kjo rrugë do të hapet deri në Aeroport. Pjesa tjetër nga Aeroporti në drejtim të Fushë-Krujës do të rikonstruktohet maksimumi për 10 ditë, tha drejtori.
Pjesë nga intervista
Akset problematike? Nuk mund të bëjmë sikur nuk i dimë ku janë rrugët që bllokohen në Shqipëri. Janë rrugët e veriut, Tamarë-Vermosh; është rruga Bogë-Theth, mund ta themi me mburrje që ështe hera e parë në 30 vite që është mbajtur e hapur në sezonin dimëror; Kukës-Shishtavec; kemi zonën verilindore Dibër, Pukë; kemi zonën e Librazhdit, Qafë-Thana por për pak kohë; një ditë të vetme patëm Llogaranë por u menaxhua shpejt.
Apeli? Ne përmendim sa herë dalim në media, ju lutem merrni masa për sezonin dimëror. Nuk është e thënë që do bllokoni vetëm veten, sepse ndodh që një makinë me goma vere, shkon në një vend me ngrica, dhe ngel, duke bllokuar borëpastruesen. Nuk i ke krijuar probleme vetëm vetes, por gjithë trafikut pas. Derisa të spostohet kjo makinë, ke krijuar trafik kilometrik. Na ka ndodhur në Qafë-Thanë kjo, prandaj apelojmë që të përdorën gomat dimërore dhe zinxhirët.
Rruga e Rinasit? Rruga e Rinasit është në kuadër të projektit të Bankës Botërore. Ka një trafik shumë herë më tepër se kur u projektua. Duhet pasur parasysh të gjithë ata që përdorin këtë rrugë janë të lirë ta përdorin deri në Business Park, por të kenë parasysh se nuk përdoret për të shkuar në Aeroport. Ata që duan të shkojnë në aeroport duhet të përdorin rrugën e vjetër të Vorës. Besoj pas 3 ditësh do të përfundojë pjesa rrugës deri në Aeroport, e më pas do të fillojmë me pjesën nga Aeroporti deri në pjesën ku lidhet me rrugën për Fushë-Krujë. Përfundimi i kësaj pjese varet nga kushtet e motit. Besoj për 10 ditë ai segment do jetë i gjithi i hapur.
