Ish-deputeti demokrat Gent Strazimiri e quan nul vendimin e Lulzim Bashës për përjashtimin e Sali Berishës nga PD, anëtarëve të Komisionit të Rithemelimit por dhe pezullimin e tij dhe të 18 demokratëve të tjerë.
“Një grupim që rri 7 orë e 17 orë nëse nuk ka asnjë funksion nuk merr asnjë vendim. Nga pikëpamja statutore u shkarkuan nga Kuvendi. Nga pikëpamja ligjore janë uzurpatorë të një godine të funksioneve që thonë se ende i mbajnë. Nga pikëpamja morale, politike, faktike, janë persona që 2 – 3 ditë më parë lyen dyert me gjak demokrati në bashkëpunim me Edi Ramën, që premtuan se do ta shembin në një beteje që ka fillim por nuk ka mbarim. Gjithçka është nul. Është vija e demarkacionit e një dhune antistatutore të nisur më 9 shtator me një vendim jo statutor dhe për të cilin u shkarkua. Vazhdoi me dhunë dhe vijoi ta mbante me dhunë. Kjo nuk është as politike as evropiane dhe nuk mund të jetë e pranueshme për këtë shoqëri”, thotë Gent Strazimiri në një intervistë për Ora News.
Ai shton se tashmë armiku i demokratëve është dyshja Rama – Basha.
“Është përpjekje e të gjithë popullit opozitar për të moslejuar marrëveshjet e hapura apo të fshehta në kurriz të shqiptarëve. Bashkëpunimi i ish kryetarit të PD-së me policinë është një ngjarje jashtëzakonisht e rëndë. Për demokratët sot armiku i tyre është Rama – Basha. Kjo shoqëri po zihen për nevojën e një opozite“, thotë ai.
