Tre shtetas të huaj janë arrestuar ditën e sotme në Durrës, ndërsa është shpallur në kërkim një grua pasi akuzohen për ushtrim të lojërave të fatit.
Burimet policore bëjnë me dije se të arrestuarit janë Muhittim Omerolu 48 vjeç, Robert Cristian 33 vjeç, dhe Sergo Solnstev 38 vjeç. Të tre shtetasit e huaj janë banues në Durrës, administratorë të një lokali, ndërsa është shpallur në kërkim Rovena Zahiri, e cila kishte marrë me qira ambientin ku zhvilloheshin lojërat e fatit.
Po ashtu, Policia bën me dije nëpërmjet një njoftimi se u sekuestruan 93 kompjuterë që shërbenin për lojërat e fatit, 4 tavolina dhe 4 ruleta.
NJOFTIMI I PLOTË:
Durrës/Vijon operaconi “Fati i lojërave”. Goditet një tjetër rast i ushtrimit të veprimtarisë së paligjshme të lojërave të fatit. Vihen në pranga 3 shtetas. Sekuestrohen ruleta, tavolina dhe aparate elektronike që përdoren për zhvillimin e lojërave të fatit. Në vijim të operacionit “Fati i lojërave”, bazuar dhe në informacionet e marra në rrugë operative se në një ambient të marrë me qira nga një shtetase, në lagjen nr.13, Durrës, po ushtrohej veprimtaria e kundërligjshme e lojërave të fatit, shërbimet e Drejtorisë Vendore të Policisë Durrës, në bashkëpunim me Komisariatin e Policisë Durrës, kanë organizuar punën dhe si rezultat kanë bërë të mundur evidentimin dhe goditjen e kësaj veprimtarie të paligjshme.
Si rezultat u bë arrestmi në flagrancë i shtetasve: M. O., 48 vjeç, R. C., 33 vjeç dhe S. S., 38 vjeç, të tre banues në Durrës. Gjithashtu u bë shpallja në kërkim e shtetases R. Z., e cila kishte marrë me qira ambientin ku zhvilloheshin lojërat e fatit. Në cilësinë e provës materiale u sekuestruan 93 aparate elektronike që shërbenin për lojërat e fatit, 4 tavolina dhe 4 ruleta. Materialet i kaluan Prokurorisë së Rrethit Gjyqësor Durrës, për veprat penale “Organizimi i lotarive të palejuara” dhe “Vënia në dispozicion e lokaleve për lojëra të palejuara”.
