Audituesit e Bashkimit Europian kanë publikuar një raport, ku evidentohet dështimi i Bashkimit Europian, në vendet e Ballkanit Perëndimor, përfshirë edhe Shqipërinë, sa i takon sundimit të ligjit.
Në raport thuhet se BE ka hedhur qindra miliona euro për të përmirësuar sundimin e ligjit në vendet e Ballkanit Perëndimor, por kjo ndihmë jo vetëm që nuk ka dhënë fryte, por ka forcuar autokratët.
Juhan Parts, i cili ka përgatitur raportin thellësisht kritik, thotë se janë shpenzuar 700 milion euro për 6 vite, por sërish kjo ndihmë nuk ka dhënë rezultate.
Në këto vende, përfshi Shqipërinë, problemet më të mëdha mbeten pavarësia e gjyqësorit, përqendrimi i pushtetit, ndërhyrja politike dhe korrupsioni.
Audituesit e BE-së thonë se problemi është se BE ka përdorur shpesh shumë karotën dhe aspak mjaftueshëm shkopin kur ka parë se investimet e saj kanë dështuar që të sjellin një ndikim në shoqëri.
“BE-ja e ka shfrytëzuar shumë rrallë mundësinë e pezullimit të ndihmës nëse një përfitues dështon të respektojë parimet themelore të demokracisë, sundimit të ligjit dhe respektimit të të drejtave të njeriut,” thuhet në deklaratën e audituesve.
Sipas raportit, në këto vende vazhdojnë të ekzistojnë problemet sa i përket sistemit të pavarur të drejtësisë, influencës politike dhe korrupsionit.
“Mbështetja e BE-së për shtetin ligjor në vendet e Ballkanit Perëndimor nuk ka çuar në një kthesë rrënjësore”, tha Juhan Parts nga zyra e Auditimit të BE-së.
Përparimet e pakta venë në pikëpyetje “vazhdimësinë e mbështetjes së BE-së në përgjithësi në kuadrin e procesit të anëtarësimit”. “Reformat e vazhdueshme humbasin besueshmërinë, nëse ato nuk sjellin rezultate të prekshme.”
Edhe Komisioni i BE-së së fundi konstatoi mangësi të mëdha sa i përket pavarësisë së sistemit juridik, luftimit të korrupsionit apo lirisë së medias. Në raportin e Këshillit të lartë të Auditimit të BE-së thuhet, se rëndom nuk bëhet sa duhet për ta forcuar vullnetin politik dhe se masat e marra shpesh nuk japin rezultat. Financimi dhe zbatimi i projekteve jo gjithmonë kushtëzohet me përmbushjen e kushteve të përcaktuara për ndihmën.
Auditimi i BE-së i rekomandon Komisionit të BE-së, që të mbështesë më fort shoqërinë civile dhe mediet. Po ashtu duhet që dhënia e ndihmave financiare nga BE të kushtëzohet me përparimin drejt shtetit ligjor dhe projektet duhet të mbikqyren me më shumë rigorozitet.
