Ish-Kryeministri Sali Berisha u shpreh se nuk ka pasur asnjë negociatë me Lulzim Bashën, ndërsa theksoi se nuk do të tërhiqej nga beteja ligjore në Gjykatën e Parisit lidhur me shpalljen “non grata”.
Berisha tha se Basha është kthyer në deputetin më të urryer në rradhët e demokratëve dhe ai është i zhytur në aferat me qeverinë Rama.
“Cilin emëroi Lulzim Basha në krye të PD të Durrësit? Emëroi personin që ka marrë tenderin e rimorkiove në Portin e Durrësit. Unë nuk kam asgjë me Luanin, por kjo është e vërteta. Në tenderin morën pjesë kompanitë më të mëdha ndërkombëtare, por Rama ia dha Luanit. Revolucioni do të zbardhë të gjitha lidhjet e njerëzve që mbështesin sot Bashën në aferat me qeverinë”, tha Berisha.
Ai u shpreh se “jo të gjithë demokratët që e mbështesin në këtë revolucion janë mbështetës të Sali Berishës, por janë demokratë, që besojnë se mund të fitojnë me mua si lider”.
“Lulzim Basha është farë e keqe, po kalon nga skandali në skandal”, shtoi Berisha.
