Kryeministri Edi Rama duket se planifikon ta nisë vitin 2020 me një tjetër përpjekje për t’iu mbyllur gojën atyre pak mediave që i kanë rezistuar kapjes nga pushteti.
Këtë të Enjte, gjatë një konference me gazetarët, Rama foli për publikimin e të dhënave personale të qytetarëve të rrjedhura në aplikacionin e komunikimit “whatsapp” – mes tyre dhe pagave.
Duke përmendur mediat, kreu i qeverisë tha se “duke filluar nga ato kompani që japin paga fiktive të rregullojnë deklarimet”.
Rama dha një afat dhe paralajmëroi burgosje.
“Tatimet do të nisin një letër për të gjithë tatimpaguesit me deklarime mosbesuese, duke iu kërkuar që të vetrregullohen deri në 20 janar, që është data e deklarimeve të reja. Në rast mosrregullimi do të ketë hetim të thelluar për evazion dhe shkon në burg. Në këtë aspekt, ne faktikisht kemi përgatitur një plan para se të ndodhte kjo, ne nuk mund të vazhdojmë të presim gradualitet sepse kemi zgjedhur gradualitetin vit pas viti për vetërregullimin”, paralajmëroi Rama.
Tentativat e Ramës për t’iu mbyllur gojën mediave kanë qenë të herëpashershme, ashtu si dhe sulmet ndaj tyre e bulizmit ndaj gazetarëve, në përpjekje për të censuruar të vërtetat dhe tjetërsuar perceptimin e realitetit me propagandë.
Një prej këtyre përpjekjeve, ishte ligji ligji i qeverisë për median online, që u rrëzua nga Komisioni i Venecias. Për këtë nisëm, të kritikuar nga organizata e figura vendase e ndërkombëtare, Venecia u shpreh në opinionin final se mund të sjellë efekt frikësues për gazetarët dhe ndrydhje të debatit të lirë në internet.
