Nga BoldNews.al
Në muajin dhjetor të vitit 2020, Ministria e Shëndetësisë shpalli fitues kompaninë EVITA, koncesionarin offshore të sterilizimit, për blerje teste të shpejta Covid 19. Në një tender pa garë, Ministria e Shëndetësisë e shpalli fitues, duke i dhënë 124 milionë lekë, ose me TVSH rreth 1.2 milionë euro.
Ndërkohë, disa muaj më vonë, përkatësisht në muajin shkurt dhe mars 2021, EVITA fitoi një tjetër tender me vlerë 5 milionë euro. Ndryshe nga hera e parë, në procedurën e dytë, morën pjesë disa kompani të tjera, që ofruan më pak por u s’kualifikuan me arsye se “s’kanë përvojë të suksesshme në kontrata të ngjashme”. Pra, një garë fiktive. Por, si mund të kishin përvojë kur tenderat e testeve të shpejta, apo negociatat e Ministrisë së Shëndetësisë, bëheshin me EVITA-n? Por, krahas 6.2 milionë eurove, Ministrja Manastirliu po pregatit një tjetër tender për blerje teste të shpejta. Dhe, pyetja që ngrihet me të drejtë: a po favorizohet sërish EVITA?!
Sipas dokumenteve që disponon BoldNews.al, Ministria e Shëndetësisë ka hapur tenderin me objekt “blerje teste diagnostike antigenike të shpejta për SARS-COV-2 për nevoja të NJVKSH-ve” për një periudhë 12 mujore, sipas listës së miratuar nga OBSH. Tenderi është hapur në datën 24 dhjetor, në vigjilje të Krishtlindjes, larg syve të opinionit publik apo larg vëmendjes mediatike që e ka zënë këto kohë pagat dhe të dhënat e qyetarëve të publikuara.
Dhe, koha është e përshtatshme që të bëhen tender të tillë, teksa vlera e procedurës është plot 369,000,000 lekë. Kodi i këtij tenderi është “materiale mjekësore të konsumueshme”, ndërsa tenderi pritet të bëhet në muajin dhjetor. Pra, në darë 24 dhjetor u shpall dhe firmat kanë vetëm 7 ditë kohë, deri në 3q dhjetor që të përpilojnë dokumentet. Afati i shkurtër nga shpallja e njoftimit e deri të bërja e tenderit ngrenë shumë dyshime, ndërsa precedentët e mëparshëm për tendera të ngjashëm të çojnë gjithmonë te emri EVITA.
BoldNews.al ka investiguar në vijimësi procedurat e Ministrisë së Shëndetësisë për blerjen e testeve të shpejta. Sipas dokumenteve, në dhjetor 2020 Manastirliu shpalli fituesin e testeve, ku fondi për këtë objekt ka qenë plot 124.000.000 lekë të rinj pa TVSH.
Në garë ka qenë vetëm një firmë, më saktë kompania EVITA. Kjo e fundit ka ofruar plot 124.000.000 lekë! Pra, është shpallur fituese me 100 % të fondit të akorduar nga Ministria e Shëndetësisë.
Ndërkohë, procedura e muajit shkurt e mars 2021, me vlerë rreth 5 milionë euro ka shkuar në KPP. Sipas vendimit, te publikuar në BoldNews.al, edhe Kmisioni i Prokurimeve Publike nuk i ka dhënë zgjidhje dyshimeve për fitues të paracaktuar për tenderin e hapur nga Ministria e Shëndetësisë për blerje testesh të shpejta për Sars-Cov-2, me fond limit 496 milionë lekë të reja pa TVSH.
Sipas operatorit ankimues, Ministria e Shëndetësisë kërkon që operatori fitues do të jetë ai që ka përvoja të ngjashme të suksesshme. Por, siç konstaton ankimuesi, Ministria e Shëndetësisë ka kryer vetëm një procedurë për blerje testesh të shpejta anti-Covid, edhe atë me “negociim pa shpallje paraprake”.
Në procedurën e parë dhe të vetme deri më tani, të zhvilluar në Nëntor 2020, fitues i tenderit me vlerë rreth 1.2 milionë dollarë, është shpallur kompania “Evita” shpk, për të cilën operatorë të ndryshëm në tregun farmaceutik janë të bindur se përfshin interesat e biznesmenit Klodjan Allajbeu.
