Nga viti 2022, të gjithë personat që blejnë një mjet, nuk do të kenë nevojë të kryejnë kontrollin fizik të tij. Kështu bëri me dije kryeministri Edi Rama në një postim në FB.
Sipas tij, kjo do të bëhet e mundur për shkak të ndërveprimit të sistemeve informatike që pas marrjes në kontroll të Kontrollit Teknik të mjeteve nga ana e Drejtorisë së Përgjithshme të Shërbimeve të Transportit Rrugor.
Rama thotë se me këtë praktikë, eliminohen 60 mijë kontrolle fizike të automjeteve në vit, ndërsa qytetarët do të kursejnë në total 90 milionë lekë, por edhe 30 mijë orë pritje në vit.
“Me këtë lajm të mirë e të shumëpritur për Drejtuesit e Automjeteve, puna vazhdon flet vetë ndërsa llafet e gojëve të shthurura dhe baltën e mendjeve të mbrapshta vijnë e ikin me erën”, u shpreh Rama.
Që nga 1 janari i vitit 2021, shërbimi i kontrollit teknik të automjeteve i kaloi Drejtorisë së Përgjithshme e Shërbimeve të Transportit Rrugor. Përveç mbylljes së marrëdhënies koncesionare, u vendos edhe që kolaudimi të kryhet vetëm 1 herë në dy vjet, për të gjitha mjetet e përdorura. Afatet u zgjatën edhe për mjetet si taksitë, autoshkollat, ato të transportit publik dhe të transportit të mallrave, që e kryejnë kolaudimin 1 herë në vit, nga detyrimi për ta bërë çdo 6 muaj. Ndërsa makinat e reja nuk kanë nevojë për këtë shërbim deri në 3 vjet pas datës së regjistrimit të parë.
