Një valë krizash, dhe një mundësi unikale për bazën e Partisë Demokratike. Kjo është pikëpamja e filozofit të njohur Artan Fuga për përplasjen e paprecedente midis Sali Berishës dhe Lulzim Bashës. Një ngjarje politike që tregon edhe specifikat me të cilat është ndërtuar politika shqiptare.
“Një krizë u krijua nga shpallja non grata. Pa i hyrë kësaj, por ajo krizë tregoi sesa pak mundësi ka një parti shqiptare e ndërtuar në mënyrë autoritare, për të zgjidhur këtë krizë. Nga përplasja e dy aktorëve, në një moment Berisha i bëri thirrje masës së anëtarëve dhe ishte në pikëpyetje pjesëmarrja kur kjo u realizua, kjo shkaktoi një krizë të dytë”, thotë ai për A2 CNN.
Sipas tij, tashmë nuk ka rëndësi se kush ka të drejtë. “E drejta vjen nga pritshmëritë dhe mënyra sesi konceptohet lidershipi nga të dyja palët. Po flasim për masa militantësh, që mund të gjykohen vetëm si veprojnë, si dhe nga numri. Pra numri i atyre që ishin në stadium , numri i atyre që do të jenë në Kuvendin e së shtunës, si dhe certifikimi i tyre”, dhe shton se janë këto faktorët që do të merren parasysh edhe në zhvillimin e një procesi gjyqësor të mundshëm.
“Nuk ka interpretim aty ku 1/4 thërret një Kuvend ku më pas merr pjesë gjysma e delegatëve, debatet janë zilka të vogla përballë kambanës që po bie”, shton Fuga.
Kriza mund të jetë një mundësi unikale, për Partinë Demokratik edhe jo vetëm. “Më në fund një krizë ka sjellë një situatë ku të gjitha palët janë të detyruar të shkojnë prapa votës të militantit, që deri më tani ishin trajtuar si ushtar. Do të ishte fatkeqësi që baza mos ta shfrytëzojë këtë rast unikal me pjekuri”, thotë profesor Fuga.
