Ish-kryeministri Sali Berisha deklaroi këtë të Hënë, pas mbledhjes së “Komisionit të Rithemelimit të PD-së” se Kuvendi i 11 Dhjetorit u mbështet nga “personalitete më të shquara të krahut konservator në Europë dhe botë”.
Lulzim Bashën e cilësoi “ish-kryetar” të partisë, “peng të Edi Ramës”, si dhe “peng të SPAK-ut”. Deklaroi se Basha ka probleme me drejtësinë shqiptare dhe atë belge. Ish-kryeministri apeloi për pjesëmarrje në referendumin e planifikuar të zhvillohet në degët e PD-së, ku anëtarët do të pyeten nëse janë dakord për shkarkimin e Bashës, vendim i marrë në Kuvendin e 11 Dhjetorit. Po ashtu, apeloi që të bojkotohet ajo që Basha e cilëson “mbledhja e Kuvendit Kombëtar të PD-së më 18 Dhjetor”. Berisha e quajti “anti-kuvend i shoqatës Rama-Bardhi”.
Për mbajtjen e referendumit, ish-lideri historik i PD-së tha se do angazhohet komisioni që mbajti punimet e Kuvendit të 11 Dhjetorit.
Lulzim Bashën e akuzoi po ashtu se ka sekuestruar karta të anëtarësisë në PD.
“Ka informuar anëtarësinë në votimet e fundit që të paraqiten me karta, i ka mbledh kartat dhe s’ja u ka thyer kartat e anëtarësisë, është plaçkitje, është akt që ngjitet në nivelin e krimit elektoral. I garantoj ata se të gjithë do votojnë”, tha Berisha.
Ish-kryeministri bëri apel për ribashkim të PD-së.
Thirrja për çdo demokrat ishte: “I ftoj të bashkohen dhe i them se kontributi i secilit do të respektohet”.
