Deputeti demokrat Luan Baçi e konsideron Kuvendin Kombëtar të PD, i cili u mbajt dje në “Air Albania”, si një leksion demokracie dhe një ditë historike.
“Ishte ditë historike për Partinë Demokratike të Shqipërisë. Për herë të parë u mblodh një Kuvend i jashtëzakonshëm që e thirret anëtarësia. Nga ana e transparencës dhe mënyrës së si u procedua ishte një leksion demokracie për të gjitha partitë demokratike dhe jo vetëm, por edhe për të gjitha partitë politike”, tha Baçi.
Sipas tij, pas Kuvendit Kombëtar, i cili shkarkoi Lulzim Bashën nga posti i PD, Basha nuk ka më asnjë fuqi vendimmarrëse.
“Kuvendi është organi më i lartë i PD dhe si i tillë, Kuvendi është vendimarrës dhe çdo vendimarrje e Kuvendit është e detyrueshme për zbatim, dhe nuk vihet në diskutim aq më tepër nga kryetari i forcës politike. Kuvendi u thirr në bazë të statutit.
Nga moment i sotëm që ky Kuvend ka mbyllur punimet Lulzim Basha nuk është më kryetar i PD dhe duke mos qenë kryetar i PD nuk ka tagër dhe nuk ka fuqi të marrë asnjë vendim. Nuk ka fuqi të mbledhë një kryesi që është e shkarkuar nga Kuvendi. Statuti që u miratu hyri në fuqi, Kuvendi mori vendimet përkatëse.
Kuvendi i datës 18 është nul dhe nuk mund të mblidhet. Nuk ka mundësi që të mblidhet Kuvendi i datës 18. Kemi 7600 delegatë që përmban Kuvendi i PD, në këta 4934 delegatë morën pjesë në Kuvendin e 11 dhjetorit, dhe duke marrë parasysh që rreth 1500 që janë të larguar nga vendi, i bie që janë një pjesë shumë e vogël, që mund të jenë 1300 delegatë. Me kaq nuk mund të mblidhet Kuvendi”, tha Baçi.
