Dhjetra automjete policie po qarkullojnë në zonën pranë Parlamentit, ndërsa do të dislokohen në oborrin e tij.
Selia e Parlamentit ndodhet pranë asaj të Partisë Demokratike dhe duket se dislokimi i disa dhjetra forcave policore, që i përkasin reparteve speciale, synon marrjen në mbrojtje të kësaj selie, nëse do të kërkohet marrja e selisë, bazuar në vendimin e Kuvendit Kombëtar të PD, i cili po zhvillon punimet në Air Albania.
Gjithashtu forca policore janë dislokuar edhe në oborrin e Xhamisë, e cila ndodhet në afërsi të PD-së.
Kjo është hera e parë në 31 vitet e pluralizmit politik shqiptar, që forca policore angazhohen në përballjet politike brenda një partie.
Nuk dihet se mbi çfarë urdhëri, forcat e policisë janë dislokuar në oborrin e Kuvendit, ndërsa ish-Kryeministri Sali Berisha, i ka drejtuar një thirrje Kryeministrit Edi Rama që të mos guxojë të përdorë policinë.
Herën e fundit kur forca policore janë përdorur në situata të tilla kanë qenë në shkurt të 1991, kur u përdorën edhe tanket për të mbrojtur ish-Bllokun. Tashmë Edi Rama ka nxjerrë automjetet e policisë dhe forcat speciale, jo për të mbrojtur ish-Bllokun, por për të penguar ndoshta anëtarët e një partie, për të shkuar në selinë e tyre.
