Edi Paloka, kreu i Këshillit Kombëtar të PD, u shpreh se ky është Kuvendi i demokratëve të lirë. Paloka tha se sot demokratët janë mbledhur 31 vjet pas themelimit të Partisë Demokratike, për ta rithemeluar atë, dhe për t´a vendosur atë në shinat e konservatorizmit.
Paloka u shpreh se sot të gjithë ne do të themi me krenari që ishim aty për rithemelimin e Partisë Demokratike. “Për herë të parë ne mbledhim Kuvendin Kombëtar me kërkesë të delegatëve”, tha Paloka, duke shtuar se “kriza e paprecedent ku gjendemi sot si pasojë e dështimeve të njëpasnjëshme për të përmbysur një regjim të korruptuar, armik të demokracisë, por mbi të gjitha pozicionimi që kryetar aktual i bëri PD, jo përballë regjimit, por për fat të keq, në krah të tij, duke e kthyer PD në një fasadë”, tha Paloka.
Ai u shpreh se sot jemi rimbledhur për të kthyer shpresën dhe besimin jo vetëm te demokratët, por te të gjithë shqiptarët.
“Sot jemi mbledhur për të ringritur opozitën e vërtetë, që është e gatshme për t´u përballur me regjimin ashtu siç ai e meriton”, tha Paloka.
Ai shtoi se të gjithë ne mbajmë përgjegjësi që nuk arritëm të fitojmë në 25 prill zgjedhjet. “Iu premtuam demokratëve se nuk do ta njihnim kurrë 25 prillin, dhe kjo u bë nga Lulzim Basha. Por në vend të luftës me Edi Ramën, një ditë para fillimit të Parlamentit, Lulzim Basha, iu plasi si bombë demokratëve, largimin e liderit historik të PD, z. Sali Berisha, nga Grupi Parlamentar”, tha Paloka.
