Ish-deputeti Lefter Maliqi, ashtu siç kishte paralajmëruar, iu bashkua sot Kuvendit të PD-së, jo si delegat, por si një nga të ftuarit, ndërsa e konsideroi 11 dhjetorin si ditë shprese për shqiptarët.
Maliqi u shpreh se me largimin e Lulzim Bashës si Kryetar i PD, i hapet rruga rrëzimit të Edi Ramës.
“Sot është një ditë historike, dhjetori i dytë, sot është një pjesëmarrje masive, anembanë vendit dhe kombit. Unë jam sot këtu në mirënjohje të veprave të zotit Berisha, siç duket nuk ka forcë që e ndal këtë uragan, zoti e deshi që Berisha të merrte këtë nismë për të bashkuar opozitën. Sot është një festë që fillon sot dhe përfundon me rrëzimin e qeverisë së korruptuar.
Pa u larguar Lulzim Basha nuk ikën as Edi Rama, sot është një ditë shprese. PD, ata pak që e mbështesin Lulin, shumë shpejt do të rrëzohen në mënyrë paqësore, ju do e shihni edhe vetë pjesëmarrjen e jashtëzakonshme që do të ketë Kuvendi i sotëm”, u shpreh Maliqi.
