Kreu demokrat, Lulzim Basha, u shpreh në një intervistë për News 24, se Kuvendi i PD-së është në 18 dhjetor, ndërsa në 11 dhjetor do të mbahet një Foltore, ku do të marrin pjesë ata që ishin në Foltoret e deritanishme.
Basha tha se deri tani është manipuluar me demokratët, veçanërisht pas masakrës zgjedhore të 25 prillit.
“Ka një keqpërdorim të demokratëve nga z. Berisha, i cili po bën një betejë për interesin personal. Kuvendi i PD më 18 dhjetor do të jetë një forum vendimmarrës i demokratëve, sikundër do i jepet një zë çdokujt që ka një mendim ndryshe”, tha Basha.
Kreu demokrat tha se Kryesia e PD vendosi në respekt të afateve statutore mbajtjen e Kuvendit Kombëtar më 18 dhjetor, duke respektuar afatin 30 ditor.
Basha tha se hallet të shqiptarëve iu mbivendos edhe halli personal i Sali Berishës, pasi shqiptarët kanë të tjera probleme dhe halle.
“Vendi ndodhet në një arrest kardiak për shkak të masakrës zgjedhore, ndërsa z.Berisha ka hallin e tij dhe po bën një betejë personale, duke keqpërdorur demokratët”, tha Basha.
