Kuvendi i 11 apo 18 Dhjetorit? Mustafaj: Ja si do zgjidhet kriza brenda PD

Kuvendi i 11 dhjetorit është i duhuri për t’i dhënë Partisë Demokratike vitalitetin që i ka munguar sidomos pas humbjes së zgjedhjeve të 25 prillit.

I këtij mendimi është analisti Besnik Mustafaj i cili në një bisedë në “Radari Informativ” u shpreh në këto muaj ka ndodhur një diferencim i qartë mes gjuhës së përdorur nga “Foltorja” dhe diskursit të ndjekur nga kreu i demokratëve Lulzim Basha dhe kryesia.

“Gjuha e përdorur nga Basha dhe kryesia, në asnjë moment nuk ka guxuar të futet në terrenin e politikës. Ndërkohë që kriza është politike”, tha ai.

Për Mustafajn, lideri historik i demokratëve nuk e ka nisur “Foltoren” për qëllimet e tij personale. Ai shton se çfarëdolloj posti të ketë Berisha në PD, nuk përbën asnjë lloj mbrojtje në betejën e tij me SHBA.

“Pati kohë, nga maji në shtator, bëri disa veprime si çelja e gjyqit për të treguar se çështja është mes tij dhe DASH dhe do ta zgjidhë në mënyrë individuale. Nuk i ka përzier, nuk ka kërkuar mandate, apo mbrojtje nga foltorja apo demokratët”, shtoi Mustafaj.

LEXO EDHE  Gjendet një trup i pajetë në Sarandë

Por cili do të ishte i duhuri për PD pas mbajtjes së dy Kuvendeve, Basha apo Berisha? Mustafaj thotë se në këto kushte, Berisha është zgjidhje më e mirë.

“Berisha nuk është zgjidhja më e mirë, por e ka zgjuar PD. E ka vitaluzuar bazën e saj që ishte në depresion. Përballë Bashës është zgjidhje më e mirë në këtë moment. Duhet mbështet ky Kuvend pa dilema”, tha Mustafaj.

Skenari më i mirë për PD pas 11 dhjetorit?

“Skenari më i mirë pas 11 dhjetorit është që PD të bëjë të gjitha ndryshimet jetike për ta hapur PD, ndryshime statutore. Berisha më duket i gatshëm t’i bëjë. Bëhen të gjitha ndryshimet, të votohen, të fitojë fuqi statuti, të hapet fushata për zgjedhjen e kryetarit të ri. Një fushatë e tipit amerikan. Për 6 muaj të gjithë kandidatët të bëjnë të mundshëm që të rreshtohen pas atij që fiton. Në fund ai që fiton të drejtojë PD drejt betejës së radhës elektorale”, tha Mustafaj.