Tenderat nga Bashkia e Tiranës, Lali Eri mban rekordin për ankimimet

Bashkia e Tiranës e drejtuar nga Erion Veliaj mban rekordin lidhur me ankimimet mbi procedurat e prokurimit, krahasuar me të gjitha njësitë vendore në vend.

Referuar buletinit të Komisionit të Prokurorimit Publik, nga 80 procedura të ankimuara, 54 janë vetëm në Bashkinë e Tiranës, çka dëshmon se operatorët, pjesëmarrës në tendera, kanë dyshime, ose kanë ngritur pretendime, lidhur me procedurat e ndjekura.

Prej kohësh janë denoncuar procedurat e prokurorimeve publike, ku duket se fituesit paracaktohen, përmes kritereve specifike, edhe pse ata mund të rezultojnë në vlera 99.99% të fondit limit apo disa qindra mijëra deri në miliona euro më shumë se operatorët e tjerë që renditen më poshtë, pra jo si fitues.

Vendin e dytë e mban bashkia e Durrësit me 11 ankesa ndërsa e treta renditet bashkia e Fierit me 4 ankesa.

Pjesa më e madhe e 80 ankimimeve lidhet me prokurorimin publik, ndërsa vetëm një ankesë është për fushën e mbrojtjes dhe sigurisë.

Ankimimet sipas fazës në të cilën është bërë ky i fundit kanë ndodhur ose gjatë vlerësimit të ofertave ose në fazën fillestare ku operatorët kanë pasur rezerva për specifikimet teknike në dokumentet standarde të tenderit.

Konkretisht, 45 janë ankimuar në fazën e vlerësimit të ofertave dhe 35 për specifikimet teknike të tenderit.
Shumë prej këtyre ankesave lidhen me procedura që kanë në objekt të tyre sigurim mallrash, të paktën 47, ndërsa në vendin e dytë janë ankesat për punë publike dhe më pas vijnë ato për shërbime.

LEXO EDHE  Gjendet një trup i pajetë në Sarandë

Komisioni i Prokurimit Publik bën të ditur se është marrë vendimi për 65 procedura, ku janë refuzuar 39, 21 janë pranuar, për 4 është mbyllur çështja ndërsa 1 është në përfundim të procesit administrativ. Gjatë tetorit rezulton gjithashtu se janë depozituar 2 padi për vendimet e KPP dhe një masë sigurie nuk është shqyrtuar ende nga Gjykata Administrative e Apelit.

Pak javë më parë Kryeministri paralajmëronte të zgjedhurit vendorë dhe ministrat se do ti dërgonte vetë në SPAK dosjet e prokurimeve publike me probleme, por duket se edhe deklaratat publike të Kreut të Qeverisë duhen marrë me rezerva, përsa kohë asgjë nuk ka ndryshuar.

Ndërsa prezantonte, paketën e re të prokurimit publik, që synonte, sipas tij, të kapërcejë sa më parë dhe sa më shpejt hendekun mes politikës dhe të ardhmes, Rama u shprehse ministrat, janë po njësoj përgjegjës si titullarët e Bashkisë për procedurat e tenderit, ku përfshihet numri i pjesëmarrjeve, vlera e kursyer në paratë e buxhetit të shtetit, nënshkrimi i kontratave, realizimi i tyre në terren si edhe kufizimi i tenderëve me negocim pa shpallje, që janë edhe 5 prioritetet e paketës së re të Prokurimeve.

Dhe të paktën në një nga kriteret e përmendura nga Rama, ajo mbi vlerën e kursyer në paratë e buxhetit, duke u bazuar në atë çka raportohet dhe denoncohet pothuajse çdo ditë, shihet qartë se vetëm për kursim nuk flitet.