Aksi Kashar-Rinas vijon të marrë jetë njerëzish për shkak të rrugës së ngushtë dhe mungesës së patrullave të policisë. Mbrëmjen e së shtunës një autoambulancë u përplas me një mjet tip golf ku si pasojë humbi jetën pacientja Anila Berdaku e cila po transportohej drejt traumës në Tiranë.
Nga SYRI TV
Një aksident tragjik është regjistruar mbrëmjen e së shtunës në rrugën e Rinasit ku si pasojë ka humbur jetën një grua rreth 42 vjeç.
Në përplasjen fatale bëhet me dije se rreth orës 23:30, në rrugën me drejtim lëvizje aeroporti ‘Nënë Tereza’, Ilir Shullazi, duke drejtuar autoambulancën si rezultat i parakalimit të gabuar që ka bërë është përplasur me automjetin Volkswagen me targë AB827AS, që drejtohej nga Antigon Abazi, banues ne Fushë-Krujë.
Sipas policisë Abazi po drejtonte mjetin në gjendje të dehur nga mbikalimi i Kasharit për në drejtim të aeroportit pasi nga verifikimi i testit për alkool rezultoi se ishte në masën 0.27mg.
Nga përplasja ambulanca është batuar në rrugë ndërsa si pasojë e aksidentit ka gjetur vdekjen brenda në ambulancë pacientja Anila Berdaku, e cila ishte nisur nga Fushë-Kruja për në Tiranë pasi kishte pasur probleme me frymëmarrjen.
Sipas burimeve është dëmtuar dhe ndodhet në gjendje jo të mirë drejtuesi i ambulancës Ilir Shullazi. Blutë njoftojnë se ndaj shoferit të ambulancës është marrë kampjon gjaku për verifikimin për alkool.
Jashtë rrezikut për jetën janë infermieri i ambulancës Arjan Balluku dhe pasagjerja e ambulancës, Marsida Berdaku.
Nga automjeti Volkswagen janë dëmtuar jashtë rrezikut dhe ndodhet në spitali drejtuesi i mjetit dhe ne gjendje jo të mirë pasagjeri Ilir Gashi, banues në Fushë-Krujë, i cili ndodhet ne Spitalin e Traumës.
Burime nga policia bëjnë se drejtuesi i ambulancës Ilir Shullazi do të ndiqet ne gjendje arresti ndërsa drejtuesi i mjetit tjetër Antigon Abazi do të ndiqet në gjendje të lirë.
Aksi Rinas Kashar është ndër më të ngarkuarit dhe shkak i aksidenteve bëhet shpesh rruga e ngushtë dhe mungesa e patrullave të policisë në këtë segment.
