Zgjedhjet e 25 prillit u trumbetuan me të madhe nga Partia Demokratike si masakër zgjedhore, por për këtë term ka pasur debate në PD, ka zbuluar në një intervistë në A2 CNN, Oerd Bylykbashi.
Ai u shpreh se masakër zgjedhore ka pasur në vitin 2001 dhe se Bashës i pëlqeu termi për ta përdorur edhe këtë herë.
“Raporti i ODIHR i ka nënvizuar problemet e zgjedhjeve të 25 prillit. Çështja kryesore e opozitës duhet të kishin qenë zgjedhjet dhe jo nxitimi i skajshëm i Bashës të rikonfirmonte veten. Ky proces shoi procesin ankimor dhe vërtetimin e shkeljeve gjatë zgjedhjeve te OSBE/ODIHR. Në mbledhje kryesie, unë kam refuzuar hapjen e procesit për zgjedhjen e kryetarit si krejtësisht i pavend dhe që do të kishte pasojë në shuarjen e momenteve të rëndësishme tonat. Kemi pasur një debat edhe nëse ishin këto zgjedhje masakër apo jo. Masakër ka qenë vitit 2001. Bashës i pëlqeu termi masakër për ta përdorur”, tha ai.
Më tej në intervistë, Bylykbashi theksoi se Basha u fut në zgjedhjet e 25 prillit me objektiva humbëse.
“Nuk ka pikën e diskutimit që Rama i vendosi një objektiv vetes të merrte 750 mijë vota sa i duheshin dhe ato do t’i arrinte me çdo kusht. Basha i vendosi objektivin partisë dhe ne u përpoqëm të jepnim maksimumin, një objektiv që ishte në nivel humbës”, tha Bylykbashi.
