Kryeministri Edi Rama priti sot në ambientet e Kuvendit një pjesë të fermerëve që po protestonin jashtë godinës për të kundërshtuar paketën fiskale, që pritet të miratohet sot. Në takimin e zhvilluar, kreu i qeverisë tha se bien dakord që skema aktuale mbështetëse për bujqësinë nuk ishte funksionale. Ai u kërkoi atyre që të sjellin javën tjetër me argumente një ide më të mirë se qeveria, me qëllimin edhe formalizimin e këtij sektori dhe u premtoi se do ta zbatojë atë.
Pjesë nga biseda
Fermeri: Kam 10 milionë lekë për të shlyer që kam marrë fidanë, vlerën e plastmasit. Po ti marr gjithë lekët e sallatorit unë nuk i shlyej dot. Me 200 lekë kg.
Rama: Ju thirra që të sqarohemi të dy palët paskemi të njëjtin hall që do të thotë që 6% nuk shkon. Çfarë ka ndodhur? pse e kemi bërë këtë deri tani dhe spe do ta ndryshojmë? Sepse e para grumbulluesit me të cilwt nuk kam asgjë se janë të respektuara në punën e tyre, pasi nuk kishim pika grumbullimi dhe ju dilnin në rrugë ose do të shkonit në treg vetë me prodhimet tuaja gjë që ju bënte të mos kishit hapësirë për të ruajtur prodhimin për ditët kur çmimi është më i mirë dhe e dyta gjë që e bën çmimin më të ulët për secilin se kur shet tek e tek je për të mbijetuar, jo për biznes dhe e treta grumbulluesit që hedhin gurin e fshehin dorën kanë marrë mbështetje nga kjo qeveri për ato investime që kanë bërë me ndërtimin e pikave të grumbullimit dhe rolin e agjentit të qeverisë për ta çuar diferencën tek ju nuk e kanë kryer.
Kreu i sindikatës së Fermerëve: 30% e fermerëve këtë sezon nuk ka kanë porositur fidanë për t’i mbjellë. Nuk kanë interes të mbjellin se janë të paorientuar.
Rama: Gjendja nuk është unifrome ka shifra eksportesh që vetëm rriten. Është çështje organizmi dhe çuarje e parasë në drejtimin e duhur jo në atë që ka devijuar dhe çfarë ka ndodhur që paratë janë 9 mln dollarë. Janë 9 mln dollarë në një sektor që ka 3.5 miliardë në sektor tani 9 milionë janë. Po të them çfarë ka ndodhur me formulën e re. Ne nuk do t’i japim më në atë formë. 9 mln dollarëshi nuk do të jepet më në atë formë, por nuk do të ikë nga bujqësia, madje është dyfishi sot për të shkuar drejtpërdrejt te fermeri, jo tek e tek por te modelet që ndihmojnë këta. Që mos bëjnë aventura individuale”.
Kreu i sindikatës së Fermerëve: 9 mln dollarë është vetëm TVSH 6% që u shkon për rimbursim pikave të eksportit. Kurse ne themi që ky 9 mln duhet të vijë sipas modelit që duam ne.
Rama: Janë 32 milionë.
Kreu i sindikatës së Fermerëve: Ne nuk jemi dakord me 32.
Rama: Po sa do ti 300?
Kreu i Sindikatës së Fermerëve: Ne kemi prurë me shkrim, kemi llogaritur efektet në buxhet të propozimeve tona se janë mbi 80 % informalë. Ky 9 mln dhe 6% i brendshëm të jepet përmes faturës tatimore direkt te fermeri.
Ministrja Ibrahimi: Janë 150 mijë të informalizuar.
Kreu i Sindikatës së Fermerëve: Ne po u propozojmë një skemë që formalizon 100% sektorin.
Rama: Kjo skemë nuk i ka çuar lekët dëm, por nuk ka bërë atë efekt që ne prisnim dhe është koha për ta ndryshuar. Unë jam gati të ulemi prapë. Ne sot kalojmë masën e buxhetit në dispozicion dhe për atë masë të ulemi prapë. Nëse ju keni një ide më të mirë se ne urdhëroni ta diskutojmë.
Fermeri: Ne nuk dimë çfarë po hedhim në tokë unë punoj, por nuk jam ekspert se çfarë po mbjell nuk jam biolog apo kimist nuk kam ide për pesticidet. Për shifra unë si fermer nuk marr vesh.
Rama: Qëllimi është ta formalizojmë sektorin dhe ju jap fjalën që javën tjetër ne ulemi pa zhurma dhe flasim me argumente nëse na jepni një ide më të mirë se ajo që kemi dhe bëjmë idenë tuaj. Rëndësi ka që u morëm vesh që kjo siç ishte nuk funksionon. Tani me këtë fond që kemi që është më i madh se ai që kishim. Hajdeni me shifra dhe përgatituni mirë.
