Ish-Kryeministri Sali Berisha nga “Foltorja” e Kuçovës, ku po zhvillon takimin e rradhës mes anëtarët dhe strukturat e Partisë Demokratike, u shpreh se kjo është mrekullia e dytë e shqiptarëve pas atij të Dhjetor ´90.
Takimit të Berishës në Kuçovë iu bashkua edhe Genc Pollo, ish-deputet i PD dhe Astrit Veliaj, po ish-deputet.
Ish-Kryeministri u shpreh se kjo lëvizje, ky angazhim, ky përkushtim, i anëtarëve, ka ngritur peshë zemrat e shqiptarëve.
“Vendimi juaj për të rithemeluar PD janë bërë dritë shprese në zemrat dhe mendjet e mbarëshqiptarëve. Foltorja u cilësua nga një demokrat i Matit si dielli i tij dhe u drejtohej analistëve të xhepit: mos ma gjuani diellin me gurë.
Foltorja vlerësohet nga mbarë shqiptarët, nga miqtë e Shqipërisë, si zhvillimi i vetëm pozitiv i 8 viteve të fundit, si shpresa e vetme që Shqipëria të ngrihet edhe një herë, që mos jemi delja e zezë e Ballkanit dhe Europës”, tha Berisha.
Ai u shpreh se 8 vitet e pushtetit të Edi Ramës ishin vitet e varfërimit të shqiptarëve. Berisha tha se shqiptarët kanë sot kanë një rrogë mesatare 30 % më të ulët se në Kosovë.
“Jemi vendi me çmimet më të larta në Rajon dhe për disa artikuj kemi po kështu çmimet më të larta se ato të vendeve të BE. Sot nafta në Shqipëri ka të njëjtin çmim sa në Zvicër, ndërkohë që atje rrogat janë 12 herë më të larta se pagat mesatare në Shqipëri”, tha Berisha.
