Rikthehet ujku i Rilindjes, hijenat bëjnë festë në sytë e luaneshës

Nga Boldnews.al

Prej ditësh ishte përcaktuar se Rama do niste një dill të ri me Ilir Beqjen, por nevojitej çasti, vendi dhe njerëzit e duhur për të bërë publik emërimin.

E ku ka më mirë që zyrtarisht Beqja të merrte detyrën e kreut të agjensisë së menaxhimit të fondeve të dhëna nga donatorët, në një takim ku ishte e pranishme ambasadorja amerikane Yuri Kim, ai i BE-së Luigi Soreca dhe ministri i Brendshëm Bledi Çuçi. Edhe tema që diskutohej ishte po aq e përzgjedhur. Flitej nga diplomatët e huaj për luftën kundër krimit të organizuar, kundër korrupsionit dhe për drejtësinë e re që me “planin 5-vjeçar” begatinë na ka sjellë.

Begatia ishte Beqja, plani është po ai i Rilindjes së Ramës. Të gjithë u gëzuan. Mire se u ktheve në vendin e duhur! Para e madhe, euro e dollarë, arka është plot, pak janë grante (dhuratë), shumë janë kredi, që për destinacion flitet se do kenë zhvillimin e vendit, rindërtimin nga pasojat e tërmetit dhe menaxhimin e pandemisë. Kryemexhuesi do të jetë Ilir Beqja.

Deri pak kohë më parë fondet e huaja kalonin në sytë dhe ‘kthetrat’ e “tigrit” të Rilindjes. Arben Ahmetaj u bë shumë më i madh duke iu dhënë pozicioni nënkryeministër. Vendi nuk duhej lënë bosh, shifrat e donacioneve të huaja dhe të kredive marramendase që vijnë nga jashtë dhe në fund do të paguhen nga të gjithë qytetarët, kërkonin një dorë të sprovuar “menaxheriale”. Tigri ngjiti një shkallë më lart, por “mëlçitë” e ardhura nga jashtë vendit, për gjoja gojët e uritura të qytetarëve shqiptarë, do të varen në qafën e të murrmit që hungërin kur shfaqet hëna dhe sytë i lëshojnë xixa sapo sheh një “kope fondesh”.

Ujku “alfa”, që tha se do të bëhet “lypsar i madh” për shqiptarët, siguroi ushqimin e bollshëm dhe për tua shpërndarë qytetarëve që u numërohen brinjët, u caktua “ujku i vjetër”, i sprovuari i tufës, që e ka treguar veten në tetë vite sesi fjala konçesion sëmur shëndetësinë apo si derri bëhet dajë.

LEXO EDHE  Petrit Vasili: I dashur Oerd, kryetari të ka mashtruar

Festa e hijenave që mbajnë varur bejxhin e pushtetit ka nisur. Ata e kuptojnë më mirë se kushdo se ka ardhur koha të mprehin dhëmbësh dhe shqyejnë sa të majmen thelën e madhe të “hedhur” si me porosi nga jashtë vendit.

Orgji fondesh, yndyrë deri në llërë për gostinë e cila ka edhe sy të tjerë që e shohin. Të flasësh për luftën kundër korrupsionin para zyrtarëve të lartë të qeverisë, për më tepër me emrat që janë vetëshënuar me germa të arta në këtë drejtim është njësoj si ti japësh çmin nobel për paqen dhe të shpallësh kalorës antikorrupsion kreun e talebanëve Abdul Ghani Baradar.

Gostia do të jetë e madhe, tigri, ujku, hijenat e shumta e kanë shtruar sofrën dhe të gjitha po bëhen në sytë vigjilues të luaneshës që as po tenton tu prishë sadopak “festën e shqyerjes” se presë të fortëve të pushtetit Rilindje.

Në vendin tonë me të drejtë ambasadorja amerikane Yuri Kim ka marrë një rol protagonizmi, duke zhvilluar takime me temat e nxehta si “lufta kundër korrupsionit dhe krimit të organizuar” me nënkryeministrin Arben Ahmetaj. Ka ende disa muaj mandat në vendin tonë dhe takime të tjera mund të zhvillohen edhe me Ilir Beqjan, për temën e dashur “si të mënaxhojmë fondeve e ardhura nga jashtë vendit”, mund të mos mungojë edhe kalorësi antikorrupsion me Dvoranër e dorovitës të valles që hidhet mu bash e në sytë e luaneshës!