Sezoni i F1 po i drejtohet fundit, teksa kanë mbetur për t’u zhvilluar edhe dy gara (më 5 dhjetor në Arabinë Saudite dhe më 12 dhjetor në Abu Dabi).
Lufta për titullin kampion është më e ndezur se kurrë, me Max Verstappen që kryeson me 8 pikë më shumë se Lewis Hamilton.
Ndryshe nga sa jemi mësuar në vitet e fundit, me kampionin britanik që e ka “vrarë” Botërorin, duke e marrë titullin me diferencë të madhe pikësh nga rivalët, tashmë kemi krejtësisht një tjetër skenar.
Kjo falë skuaderisë Red Bull të cilët kanë përmirësuar në mënyrë drastike performancat e tyre krahasuar me vitet e shkuara, ndërsa punën fantastike të inxhinierëve të skuderisë austriake e ka shfrytëzuar një talent i madh si Verstappen i cili është pranë kurorëzimit të ëndrrës, për të fituar Botërorin e parë në karrierë.
Ndonëse mundësitë që titulli të vendoset në garën e radhës më 5 dhjetor në favor të Verstapen nuk janë shumë të mëdha, le të shikojmë se cilët janë skenarët që do të vulosnin kampionatin në favor të 23-vjeçarit holandez.
Verstapen shpallet kampion bote në Arabinë Saudite nëse:
-Fiton garën dhe bën xhiron më të shpejtë, ndërsa Hamilton nuk regjistron rezultat më të lartë se vendi i shtatë.
-Fiton garën dhe Hamilton nuk shkon më shumë se vendi i tetë.
-Renditet në vend të dytë dhe siguron xhiron më të shpejtë, ndërsa britaniku nuk shkon më shumë se vendi i dhjetë. -Renditet i dyti, ndërsa Hamilton nuk futet në zonën e pikëve.
