Nga Boldnews.al
Përfaqësuesi ligjor i Presidentit të Republikës deklaroi se do të ankimojë vendimin e Gjykatës Kundër Krimit të Organizuar dhe Korrupsionit, e cila pranoi kërkesën e SPAK-ut për të pushuar hetimet ndaj gjyqtarit Ardian Dvorani.
Pavarësisht rrugës proceduriale, si juristi i Presidencës, ashtu edhe titullari i tij, e kanë shumë të qartë se në çdo gjykatë shqiptare që të ankohen për Dvoranin, do të dalin të humbur.
Një gjë e tillë është e qartë edhe për këdo që ndjek zhvillimet politike në Shqipëri.
Pasi, hetimi ndaj Ardian Dvoranit nuk ka asnjë lidhje me ligjin. I gjithë procesi penal është thjesht dhe vetëm politikë, ku ndërthuren edhe dëshira të ambasadores amerikane në Tiranë, Yuri Kim.
Për një rifreskim të situatës; në shkurt 2019, Presidenti Ilir Meta kallëzoi penalisht Ardian Dvoranin, në atë kohë drejtues i Këshillit të Emërimeve në Drejtësi se, duke shpërdoruar detyrën, tentoi të dorëzonte emërimet e anëtarëve të rinj të Gjykatës Kushtetuese në duart e Partisë Socialiste në pushtet.
Qëndrimi i Metës për sjelljen jo-korrekte të Dvoranit u mbështet edhe nga një Opinion i Komisionit të Venecias, publikuar në Mars 2020.
Për Komisionin e Venecias, qasja e Dvoranit, “krijoi një situatë në të cilën të gjitha emërimet, përveç emërimit të zotit Muçi, ishin bërë potencialisht në një mënyrë antikushtetuese”.
Ndërkohë që ndodhnin këto zhvillime, Struktura e Posaçme Kundër Korrupsionit (SPAK) vijonte me qetësi olimpike hetimin penal ndaj Ardian Dvoranit.
Pas gati dy vitesh, prokurorët arritën në konkluzionin se gjyqtari nuk ka kryer asnjë vepër penale dhe për këtë iu drejtuan Gjykatës, e cila e miratoi kërkesën e saj.
Ky zhvillim ishte paralajmëruar më herët, sidomos pas ndërhyrjeve pro-Dvoranit të ambasadores amerikane në Tiranë, Yuri Kim, e cila proklamon një drejtësi të pavarur, të paanshme dhe pa ndikime në Shqipëri.
Kim, sipas deklarimeve publike në Presidentit Meta, ka qenë gjithnjë në favor të Ardian Dvoranit.
Në një intervistë të pak muajve më parë, kreu i Shtetit deklaroi se “Ambasadorja Amerikane më ka kërkuar mua si President, një ditë para mbledhjes së KED-së të pranoj unë Adrian Dvorani. Këtë ajo e kërkoi jo në emër të Amerikës, po në emër të Edi Ramës”, duke iu referuar një mbledhjeje të Këshillit të Lartë Gjyqësor ku u vendos largimi i Dvoranit nga Gjykata e Lartë dhe KED për shkak të mbarimit të mandatit.
Meta nuk e pranoi këtë kërkesë të Yuri Kim. Por ambasadorja nuk qëndroi duarlidhur.
Në Shkurt 2021, ambasadorja publikoi një vendim të Departamentit të Shtetit, në të cilin Ardian Dvorani shpallej “kalorës i antikorrupsionit”.
Ky vendim për opinionin publik shqiptar, përfshirë edhe për socialistët që mbështesnin Dvoranin, u duk tërësisht absurd.
Në Shqipëri, nuk ka asnjë person që të tregojë se cili është roli i Dvoranit në luftën kundër korrupsionit, se cilat janë nismat e tij dhe bëmat që mund të rrëfehen, për të merituar titullin e lartë të “kalorësit anti-korrupsion”.
Natyrisht, të gjithë e kuptuan se “kalorësi” nuk mund të preket nga hetimi penal.
Prokurorët e SPAK-ut, të cilët nuk e kanë aspak problem të dëshmojnë se baza e punës së tyre nuk është ligji, por orientimet politiko-diplomatike të “Rrugës së Elbasanit”, e morën mesazhin.
“Kalorësi” nuk mund të preket. Ai ka “luftuar korrupsionin”, prandaj u bë edhe kalorës.
