Rama u heq fermerëve subvencionin dhe Braçen, u ngre satelitët

Nga Boldnews.al

Fermerët shqiptarë kanë nisur prej disa ditësh protestën, ku kërkojnë rikthimin e rimbursimit me 6 % të prodhimeve bujqësore që ata tregtonin. Kjo skemë u hoq nga qeveria dhe fermerët të vetmet rrugë gjetën protestën në rrugë, por për kryeministrin Rama ata janë “keqinformuar”, pasi sipas tij heqja e rimbursimit është në të mirë të tyre. Pra vetë fermeri ja fut kot, ai që prodhon në fushë, që derdh djersën dhe në fund tenton të kapë tregun, nuk merr vesh nga bujqësia, pasi atë e di qeveria…

E di kryeministri që sot u tha fermerëve se vërtetë u ka hequr subvencionin nëpërmjet rimbursimit, por do ngrejë satelitët në hapësirë për të kontrolluar domatet, specat, e kastravecat në arë. Perveç një tallje e frikshme dhe një ironi që grryen edhe më shumë se breshëri që shkatërron prodhimet bujqësore të fërmerëve, Rama më se paku duhet të dëgjojë ish-nënkryeministrin Erion Braçe, i cili tani që nuk ka post, kur flet për fermerët përlotet. Ai doli edhe kundër heqjes së tarifës së subvencionimit, por vetëm në facebook dhe jo me votë në Parlament, e aq më pak tia përplasë ballaz Ramës.

Tashmë Rama pasi fermërëve u hoqi subvencionet, madje u “hoqi” edhe Braçen që pretendoi se ishte në krah të çdo fermeri, si nënkryeministër, apo si deput, u tregon bujqve se çfarë është sateliti. Po ky sateliti i Ramës a ja punon tokën fermerit, a sjell fara cilësore, po pesticidet e nevojshme? Në të vërtetë fermeri sot është një bujk që mëton të kapërcejë nga ajo bujqësi gati mesjetare në disa zona në një tentativë për tu afruar disi nga modernja. Ndërsa bujqësia me atë hall të madh që mban mbi shpinë i jep mirë GDP-së (prodhimit të brendshëm kombëtar), merr shumë pak nga ana e qeverisë. Madje edhe ajo që jepet në emër të bujqësisë ka kaluar në duart e oligarkisë që po rrëmben edhe qindarkën e fundit të fondeve të destinuara për bujqit.

LEXO EDHE  Ikën shiu, por vjen i ftohti polar. Ja sa pritet të shkojnë temperaturat ditët në vijim

“Sot bota cilësinë dhe garancinë e produktet e kontrollon me satelitët dhe jo me inspektor. Dhe ky është një tjetër komponent që të do mbulojnë satelitët tanë”-tha Rama në një takim me nëpunës të Rilindjes të “veshur si fermerë”. Po atë farën e keqe të domateve që futi shteti ynë nga kompanitë monopol me lidhje pranë qeverisë, a do e kontrollojnë satelitët. Po pesticidet e dëmshme që u ngrihet trau i doganës a e kontrollon sateliti i Ramës? Po të fortët e zonave në Fier, Berat apo Lushnje që kanë rrëmbyer tokat në të ashtëquajturën “zhvillim rural” a i zbulon sateliti i Ramës.

Sot bujqësia është në kulmin e rënies. Fermerët nuk mbështeten, ndërsa shpesh janë në mëshirë të motit që u dëmton prodhimet, duke i futur thellë e më thellë në borxhe. Një pjesë e fermerëve që kanë tentuar të investojnë në bujqësi, kryesisht në ngritjen e serave dhe të mbarështimit të gjedhit janë në kulmin e humbjeve. Vitin e kaluar një farë e keqe që erdhi në vend me ndikimin e “farës së Rilindjes”, bëri që fermerët të dëmtoheshin nga prodhimi i domates. Kalbej e gjitha, duke skuqur fushat dhe lëshuar erën e rëndë të kalbësisë që erdhi nga vetë strukturat shtetërore.

Në Ministrinë e Bujqësisë u thonë fermerëve se po e trajtojnë rastin dhe presin që të dalin analizat. Por “shpresa” është që me ngritjen e satelitit në hapësirë gjatë muajit mars, mund të vijnë edhe “përgjigjet e analizave” për farën e keqe…, paçka se fara e keqe që ka lëshuar rrënjët për tetë vite është pikërisht në zemër të Tiranës.