Fuga: Ndërhyrja e faktorit ndërkombëtar në këto 5 vite ka qenë e njëanshme, në favor të Ramës

Ndërhyrja e faktorit ndërkombëtar në këto 5 vite ka qenë e njëanshme në favor të Ramës. Kështu u shpreh në Intervistën në A2 akademiku Artan Fuga. Sipas tij kjo, ka ardhur për shkak të rezistencës së opozitës ndaj projekteve amerikane e europiane.

“Partnerët e aleatët tanë, të rëndësishëm dhe të dobishëm, gjithë kohën kanë luajtur rol garant të paanshëm të demokracisë. Këtë radhë dukshëm kanë qenë në mbështetje të Ramës. Një supozim është që 7-8 vitet e fundit opozita i ka rezistuar shumë projekteve amerikane e evropiane në Shqipëri. Si reforma në drejtësi apo ajo zgjedhore. Dhe në momentin kur ti si opozitë ke këtë qëndrim, besojnë atë që është në qeveri dhe që çon përpara projektet”.

Ndërkaq, përkundër shumë zërave që vlerësojnë politikën kosovare krahasuar me atë shqiptare, Fuga thotë se nuk janë më të mirë apo më të këqinj se ne, por është një politikë e brishtë për shkak të pafuqisë financiare së politikanëve atje, që janë të detyruar të respektojnë votën sikurse ndodhi me me politikën tonë të viteve ‘92-‘93

LEXO EDHE  SHÇBA arreston komisarin e “Fast Albania”, ja për çfarë akuzohet

“Shqiptarët e Kosovës nuk janë më të këqinj se ne në politikë, por as më të mirë se ne. Dhe nuk jam dakord me këtë lojë që bëjnë politikanët tanë që thonë ja sa mirë Kosova. Në Kosovë kanë qenë disa personalitete për dy dekada, që janë sot të ndaluar nga gjykata ndërkombëtare, këta e qarkullonin pushtetin. Në momentin që u hoqën, tani ka dalë një grup tjetër që nuk kanë as mbështetjen e fuqinë financiare që të jetë stabël. Kosova sot është siç ishte Shqipëria në ‘92-‘93 që liderat nuk kishin pasuri e status dhe duke qenë fragil ia linin vendin njëri-tjetrit në funksion të votës, kurse në Shqipëri politikanët janë aq të fortë sa e manipulojnë votën. Manipulimin në Kosovë e bënin ata që u hoqën, dhe kur këta u hoqën, skena politike kosovare u bë e brishtë, kur kjo ndodh politikanët janë të detyruar të respektojnë elektoratin”.