Një gjyqtari i është dhënë drita jeshile për të vijuar kandidimin për vendin vakant të Vitore Tushës dhe Fatmir Hoxhës në Kushtetuese, ndërsa dy janë përjashtuar.
Në mbledhjen e së Enjtes, anëtarët e KED miratuan raportin e dekriminalizimit të përgatitur nga personi i autorizuar nga ky institucion për rezultatet e verfikimit të dekriminalizimit për kandidatët Zhaklina Peto, Ervin Karamuço dhe Helena PAPA.
Në përfundim, Këshilli i Emërimeve në Drejtësi vendosi “lejimin e kandidimit dhe vijimin e procedurës së vlerësimit, pikëzimit dhe renditjes” së Ervin Karamuços – kandidatit për gjyqtar në Gjykatën Kushtetuese për vendin vakant të Vitore Tushës dhe Fatmir Hoxhës.
Për të njëjtat vende vakante, KED vendosi ndalimin e kandidimit dhe mos vijimin e procedurës së vlerësimit, pikëzimit dhe renditjes për Zhaklina Peton e Helena Papan.
Kandidatët për të cilët është vendosur ndalimi, kanë patur mangësi të një apo disa kushteve të parashikuara nga Kushtetuta dhe ligji, sqaruan burime zyrtare nga KED.
