Tirana përgatitet për të tjera aktivitete me grumbullime të mëdha, ndërsa ekspertët vijojnë thirrjet për ndalimin e tyre.
Drejtoresha e Institutit të Shëndetit Publik, Albana Fico, bën të ditur për A2 CNN se mosrespektimi i masave do të na çojë në përkeqësimin e situatës.
“Duket sikur ka një relaksim që nuk i shkon përshtat askujt për këtë situatë që jemi. Institucionet shtetërore, operatorët ekonomikë, në auditorë e kudo duhet të ndërmerren masa sepse jemi në kohë për të mos shkuar në një dishezë që askush nuk e do”, tha Fico.
Por nëse institucionet përgjegjëse, organizatorët e aktiviteteve dhe qytetarët do të vijojnë me injorimin e masave anti-Covid, anëtarja e Komitetit Teknik nuk përjashton mundësinë e ashpërsimit të kufizimeve.
“Nëse vazhdojmë me rritje të numrave, të jemi të sigurt që nuk do të hezitojmë të marrim masa për të minimizuar dhe për të ndërprerë zinxhirin e infeksionit”, shprehet Fico.
Tirana, Vlora dhe Gjirokastra kanë numrin me të lartë të infektimeve. Ndërkohë, dimri pritet të jetë i vështirë për shkak të qarkullimit të virozave respiratore dhe gripit në qarkullim.
