VIDEO/ Mashtrimi përmes “Call Center-ave”, arrestohen 8 persona, 3 në kërkim

Tetë persona janë arrestuar, ndërsa 3 të tjerë janë shpallur në kërkim pasi akuzohen se mashtronin përmes qytetarë të huaj, përmes një “Call Center-i” me bazë në Shkodër.

Elisa Kolndreu, 22 vjeçe, Olda Shpendi, 20 vjeçe, Aishe Baci, 30 vjeçe, Senada Alija, 21 vjeçe, Sonila Alija, 24 vjeçe, Ervin Osja, 29 vjeç, Nikolin Toma, 26 vjeç dhe Ysniela Dalipi, 27 vjeçe, u arrestuan.  Gjithashtu u bë shpallja në kërkim dhe po punohet për kapjen e shtetasve   Pawel Wziontek, 27 vjeç (shtetas polak), Alma Sokoli, 21 vjeçe (bashkëjetuesja e tij) dhe Klodian Memo, 38 vjeç.

Sipas policisë, këta shtetas, prej një periudhe 1-vjeçare kishin krijuar një skemë që kryesohej nga shtetasi polak shpallur në kërkim, i cili kishte rekrutuar si menaxherë shtetasit shqiptar Ysniela Dalipi, Klodian Memo dhe Nikolin Toma. Kjo skemë ushtrohej në lokacione të ndryshme dhe konsistonte në mashtrimin kompjuterik nëpërmjet programeve dhe platformave të ndryshme si Vicidial, Forex dhe Exchange, në dëm të shtetasve të huaj, kryesisht atyre gjermanë dhe spanjollë.

LEXO EDHE  Tre humbje jete dhe 195 të infektuar në 24 orët e fundit në Shqipëri! Harta

Nga hetimet ka rezultuar se shtetasi polak, me qëllim shmangien e hetimit pas operacionit kombëtar kundër mashtrimeve kompjuterike, kishte bërë çregjistrimin e të gjithë punonjësve dhe kishte vijuar ta ushtronte aktivitetin në fjalë në mënyrë të fshehtë.

“Po vazhdojnë hetimet për verifikimin e të gjitha investimeve në pasuri të luajtshme dhe të paluajtshme që kanë bërë personat e përfshirë në ketë veprimtari, në koordinim dhe me autoritetet gjermane, spanjolle dhe polake, me qëllim konfiskimin e te gjitha aseteve të përfituara nga kjo veprimtari e paligjshme. Njëkohësisht vijon puna për evidentimin e të gjitha subjekteve call center që ushtrojnë aktivitetin e tyre në mënyrë të paligjshme me anë të mashtrimeve kompjuterike, brenda dhe jashtë vendit”, bën të ditur policia.

“Materialet procedurale iu referuan Prokurorisë Shkodër, në ngarkim të shtetasve të lartpërmendur, për veprat penale ‘Pastrimi i produkteve të veprës penale ose veprimtarisë kriminale’, ‘Mashtrimi kompjuterik’, ‘Fshehja e të ardhurave’, ‘Ushtrimi i një aktiviteti tregtar të paligjshëm’, ‘Mospagimi i taksave dhe tatimeve’ dhe ‘Punësimi i paligjshëm'”, shtuan të njëjtat burime.