Një skandal i rëndë me dyshime të forta korrupsioni ka shpërthyer në zemër të sistemit të drejtësisë shqiptare, duke përfshirë Prokuroria e Tiranës dhe Gjykata e Tiranës. Në qendër të kësaj çështjeje është emri i Giorgi Salukvadze-s, një shtetas gjeorgjian i konsideruar si një nga figurat kryesore të rrjeteve të mashtrimit me call center që operonin nga Tirana, duke zhvatur qytetarë europianë përmes skemave të sofistikuara financiare.
Sipas të dhënave që qarkullojnë në rrethe hetimore dhe burime të brendshme, si Giorgi Salukvadze ashtu edhe Amant Josifi ushtronin në thelb të njëjtën veprimtari kriminale: ndërtimin dhe funksionimin e rrjeteve të mashtrimit përmes call center-ave që targetonin qytetarë të huaj me skema investimesh false, forex dhe platforma online.
Të dy konsiderohen si operatorë të nivelit të lartë në këtë industri të paligjshme, me struktura të organizuara, staf të trajnuar dhe rrjete të shtrira përtej Shqipërisë.
Por ndryshe nga sa mund të mendohet, ata nuk ishin pjesë e së njëjtës strukturë, përkundrazi, ishin rivalë të drejtpërdrejtë në një treg miliona-eurosh. Bëhet fjalë për dy grupe konkurruese që luftonin për dominim, ndikim dhe kontroll të tregut të mashtrimeve online. Konkurrenca mes tyre nuk zhvillohej në mënyra të zakonshme biznesi, por përmes rrjeteve, aksesit në burime, fuqisë financiare dhe lidhjeve që secili grup arrinte të ndërtonte në hije.
Ky rivalitet i fortë hedh dritë edhe mbi tensionet dhe përplasjet e mundshme brenda kësaj industrie kriminale, ku çdo aktor kërkon të zgjerojë territorin e tij dhe të dobësojë kundërshtarin. Në këtë kontekst, prania e Giorgi Salukvadze-s në Shqipëri dhe aktiviteti i tij intensiv në furnizimin dhe operimin e rrjeteve të mashtrimit e vendos atë në një pozicion të drejtpërdrejtë përballë figurave si Amant Josifi.
Salukvadze, i lindur më 3 janar 1993 në Gjeorgji, ishte prej kohësh në radarët e autoriteteve ndërkombëtare ligjzbatuese, pasi dyshohet se kishte përvetësuar dhjetëra milionë euro përmes mashtrimeve. Ai ishte sinjalizuar edhe më herët për përpjekje për të zhdukur prova dhe për të fshehur gjurmët e aktivitetit të tij në Tiranë. Arrestimi i tij u bë nga Policia e Shtetit në një operacion të mbajtur relativisht të fshehtë, në një moment kur dyshohej se ai po përpiqej të largohej nga Shqipëria.
Por ajo që e bën këtë çështje edhe më tronditëse janë zhvillimet pas arrestimit. Sipas sinjalizimeve dhe burimeve të brendshme, ndaj prokurorit dhe gjyqtarit të çështjes janë ushtruar ndërhyrje të forta korruptive. Pretendohet se një shumë prej rreth 500 mijë eurosh është dhënë për të siguruar lirimin e tij nga burgu, një ndërhyrje që, nëse provohet, përbën një nga skandalet më të rënda të viteve të fundit në sistemin e drejtësisë.
Dhe pikërisht kjo ndodhi. Vetëm pak ditë pas arrestimit, Giorgi Salukvadze u lirua nga burgu në rrethana tepër të dyshimta, duke ngritur pikëpyetje të mëdha mbi mënyrën se si funksionon drejtësia në vend. Ky vendim i hapi rrugën arratisjes së tij, duke i dhënë kohën dhe mundësinë të zhdukej pa lënë gjurmë.
Dyshohet se ai është larguar nga Shqipëria me shuma të mëdha parash cash të përfituara nga aktiviteti kriminal, duke i shpëtuar përkohësisht ndjekjes penale dhe duke vënë në pikëpyetje serioze besimin e partnerëve ndërkombëtarë tek institucionet shqiptare.
Rasti ngre një sërë pyetjesh të forta: kush janë prokurori dhe gjyqtari që firmosën lirimin e tij? A kemi të bëjmë me një rast të izoluar apo me një skemë më të gjerë korrupsioni? Dhe a lidhet kjo edhe me luftën e ashpër për treg mes grupeve rivale që operojnë në industrinë e call center-ave mashtrues?
Hetimet pritet të zbardhin jo vetëm rrjetin e bashkëpunëtorëve dhe lidhjet e mundshme me figura të tjera të kësaj industrie, por edhe mënyrën konkrete të funksionimit të këtyre strukturave, që prej kohësh kanë krijuar një ekonomi paralele mbi mashtrimin ndërkombëtar.
Ky skandal rrezikon të thellojë edhe më tej krizën e besimit ndaj institucioneve të drejtësisë në Shqipëri, duke ekspozuar një realitet shqetësues, një treg kriminal ku jo vetëm që operohet me miliona euro, por ku rivaliteti mes aktorëve të tij mund të ndikojë edhe në zhvillimet më të ndjeshme të drejtësisë në vend./ Publik.al
