Dinamo është skuadra e fundit çerekfinaliste e Kupës së Shqipërisë. Blutë kanë mposhtur pas goditjeve të 11-metërshave Tiranën në një ndeshje të mbushur me emocione dhe gola.
90 minutat e lojës së rregullt ishin shumë emocionuese e gjithashtu edhe shumë e fortë me përplasje fizike në fushë. Si Dinamo dhe Tirana japin sinjale me disa raste por bardheblutë bëjnë më mire kur në 35’ Aldi Gjumsi me një gjuajtje në zone kalon në avantazh skuadrën e Shehit.
Pjesa e dytë duket si një strategji për t’u mbrojtur nga Dinamo dhe me Tiranën që bën lojën dhe në 78’, bardheblutë shënojnë sërish me penallti të shkaktuar nga portieri Bakaj në zone ndaj Hotit. Nga pika e bardhë ekzekuton Limaj që e çon ndeshjen në 2-0 dhe skuadrat në shtesa pasi edhe dueli i parë u mbyll me këtë rezultat për Dinamon.
Me gjithë përpjekjet e mëdha nuk pati gola në dy pjesë të shtesave dhe me penallti më të mirën mori Dinamo që fitoi 8-7. Kështu në çerekfinalen e Kupës së Shqipërisë shkon nëndetësja blu me Tiranën që mbyll rrugëtimin në kompeticionin e dytë për nga rëndësia ashtu si Kukësi.
