“Fluturo në hapësirat kaltëroshe të parajsës”/ Shkolla vajton me poezi Mateon

Shkolla 9-vjeçare “Thanas Ikonomi” në fshatin Grecalli të Fierit ku 8-vjeçari Mateo Vasiu merrte mësim është tronditur nga vrasja makabre e nxënësit të saj.

Ai ishte në klasën e tretë në këtë shkollë, por sot banka e tij ishte bosh.

Për ta kujtuar vendin e tij e kishte zënë një tufë me lule të freskëta. Ndërsa në faqen zyrtare në FB të shkollës është postuar kjo poezi si homazh për humbjen e Mateos së vogël.

“Mateo i shtrenjtë”

Yll i bukur i shkollës sonë,

Mateoja ynë i shtrenjtë,

Pse sot je veshur me petkun e zi,

e në zemër na le të madhen brengë?

Ku janë buzëqeshja jote,

dhe e zhdërvjellta shkathtësi?

Pse sot po rri kaq i heshtur,

dhe nuk na flet më përsëri?

Banka vajton se është bosh,

Shokët vajtojnë fatin tënd të zi.

Mallkuar qoftë dora vrastare,

që ta preu në mes të padjallëzuarën fëmijëri!

Fluturo në hapësirat kaltëroshe të parajsës,

engjëll i pafajshëm fëmijëror!

Shpirti t’u prehtë në paqe,

dritëz e bukur dielli pranveror!

Lidhur me ngjarjen, foli dhe drejtoresha e shkollës për gazetarët. “Një ngjarje e rëndë, një ngjarje që ka tronditur të gjithëve. I shprehim ngushëllimet familjes për humbjen e engjëllit të tyre. Mateo ishte në klasën e tretë, ishte një fëmijë i shkëlqyer”, u shpreh drejtoresha e shkollës “Thanas Ikonomi”.

LEXO EDHE  Oriola Pampuri: Ne kemi çuar në SPAK të gjithë shkelësit, çështjet ngecën aty