Kryetari i PD-së, Lulzim Basha, ka sfiduar sot ish-Kryeministrin Sali Berisha, duke propozuar mbledhjen e Kuvendit Kombëtar të kvsaj partie, jo me 11 por me 18 dhjetor, dhe natyrisht me një tjetër rend dite, nga ai i propozuar nga lideri historik i PD.
Berisha, me 4200 firmat e mbledhura nga delegatët, ka propozuar që Kuvendi i PD, më 11 dhjetor të ketë këtë rend dite:
– Miratimi i ndryshimeve statutore sipas propozimeve konform nenit 43/4 dhe 60 të Statutit të PDSH për rivendosjen dhe garantimin e demokracisë në vendimarrjen në forumet e Partisë Demokratike. Analiza e qëndrimeve dhe akteve të Kryetarit Basha ndaj parimeve themelore e normave të statutit dhe ndaj forumeve të Partisë Demokratike
– Vendimarrje sipas ndryshimeve statutore të propozuara dhe thirrja e referendumit të anëtarëve të Partisë Demokratike për të miratuar vendimet e Kuvendit Kombëtar të Partisë Demokratike
– Përcaktimi i aksionit politik opozitar të Partisë Demokratike të Shqipërisë
– Të ndryshme
– Për ndryshimet statutore do diskutohet mbi bazën e propozimeve të anëtareve të Kuvendit dhe Këshillit Kombëtar që do parashtrohen në këtë Kuvend.
Ndërkohë, Basha me propozimin e sotëm për mbledhjen e Kuvendit më 18 dhjetor kërkon që Kuvendi Kombëtar të ketë këtë rend dite:
1-Vendimmarrje mbi situatën politike, si dhe marrjen e masave për të mbrojtur interesin e Partisë Demokratike, duke mos lejuar që problemet apo interesat personale të secilit anëtar të dëmtojnë interesat elektorale dhe politike të PD, dhe axhendën e saj politike në përballjen me regjimin e Edi Ramës.
2-Miratimin e Aksionit Politik për të ardhmen e Partisë Demokratike dhe shpalljen e Platformës Qytetare për Demokraci, për rikthimin e legjitimitetit dhe demokracisë në vend, si dhe ndërtimin e mekanizimit të bashkëpunimit me të gjitha forcat e shoqërisë në përballjen me regjimin e Edi Ramës, i cili në aleancë me krimin e organizuar dhe korrupsionin ka shkatërruar çdo mjet të funksionimit demokratik të shtetit shqiptar dhe po nxit braktisjen masive të vendit nga qytetarët dhe kryesisht të rinjtë.
3-Miratimin e programit organizativ të Partisë Demokratike për të përgatitur strukturën e partisë për zgjedhjet e ardhshme, sipas objektivit “Partia Demokratike, partia e demokratëve dhe çdo shqiptari të ndershëm – Forca e vetme politike që do të sjellë ndryshimin në Shqipëri”.
Kuptohet se rendi i ditës së propozuar nga Basha nuk ka asnjë lidhje me atë të propozuar më herët nga Berisha, çka do të thotë se palët jo vetëm duhet të dakordësohen për datën, por edhe për rendin e ditës që duhet të diskutojë Kuvendi Kombëtar.
Kreu demokrat Lulzim Basha ka lëvizur nga pozicioni i tij i prerë se nuk do të ketë Kuvend Kombëtar anti-amerikan, ndonëse edhe Berisha në qëndrimet e tij, është shprehur se ky Kuvend do të jetë më pro-amerikani.
