Në Kosovë, qytetarët votojnë sot për të zgjedhur kryetarët e 21 komunave, përfshirë edhe atë të kryeqytetit, Prishtinës.
Sipas të dhënave të Komisionit Qendror të Zgjedhjeve deri në orën 15:00 kanë votuar rreth 24 për qind e votuesve.
Të drejtë vote në këtë rund zgjedhjesh kanë 1,260,571 qytetarë dhe ata do të mund të votojnë në 575 qendra votimi me 1,638 vendvotime.
Vendvotimet për rundin e dytë të zgjedhjeve lokale do të mbyllen në ora 19:00.
Komisioni Qendror i Zgjedhjeve ka pranuar përmes postës 1,571 pako me fletëvotime nga votuesit që jetojnë jashtë Kosovës.
Presidentja e Kosovës, Vjosa Osmani, pasi ka votuar, ka thënë se detyrimi qytetar për kontribuuar në demokracinë e vendit tonë nuk ka përfunduar më 17 tetor.
Ndërkaq, kryeministri i Kosovës, Albin Kurti, ka thënë pas votimit se zgjedhjet komunale janë të rëndësishme, pasi “komuna është shumë e rëndësishme, në njërën anë është publikja e lagjes dhe në anën tjetër është qeliza e Republikës”.
